Ui khuahkhirh chungchang hi…

Niminah Lawngtlai bawrhsapin ui khuahkhirhna thupek a chhuah a. Ui khuahkhirhna thupek hi, a tlangpui zawr zawr — i) Mahni chenna hmun bakah an tla tur a ni lo; khawlaia chhuahpui dawnin Ui neitu ten chain nen an kai tur a ni. ii) Ui vulhtuten anti-rabbies vaccine an pe tur a ni. iii) Khawlaia ui tla reng reng neitu awm lo (Stray dog)-a ngaih a ni. iv) Fimkhur loh vanga uiin mi a seh chuan a neituten uiin â seh damdawi leh inenkawlna senso an tum ang. iv) Ui khuahkhirh lohvin mihring a seh chuan BNS, 2023 section 291 hmangin ui neitu chu thla ruk chhung lung in tan emaw Rs. 5,000/- thleng emaw chawitir theih a ni.
A chunga khapna thupek ang hi district hrang hrang thuneitute pawhin an chhuah Thin. Thupek hi thla hnih/thla thum danah tihchhuah Thin a ni awm e.
Aizawl khawpuiah pawh local council-ten ui khuahkhirhna thupek hi an huam chhung Theuhah a remchan dan angin social media kaltlangte pawhin an theh darh chhawng ve leh Thin. “Ui khuahkhirhna thupek ka lo hre lo alawm” tih theih a ni lo. A lo hre lo hul hual an awm a nih pawhin, ‘dan hriat loh hi chhuanlam theih a ni lo’ (ignorance of law is no excuse) tih dan a awm tlat.
Supreme Court pawhin ui (abikin khawlai ui ‘stray dog’) chungchangah tunhnai khan thupek a chhuah a. Nimin mai pawh khan, educational institutions, hospitals, sports complexes, bus depots leh railway stations etc. huam chhunga khawsa khawlai uite chu senghawi vek turin State & UT tin te a hriattir leh a ni.
Supreme Court hial a inrawlh tawh a, chutih laiin Mizoramah chuan, ui khuahkhirhna thupek tihchhuah bak hi a taka hma han lak chhunzawm vakna a awm ngai meuh lo. Tun dinhmunah pawh hian, social media lamah khapna thupek hi a darh chak leh viau tawh a, mahse veng tin deuhthaw hian, ‘kan kawtah ui êk a awm leh tawh’ tih te, ‘khawlaiah ui an la tam lutuk’ tih te, ‘kahhlum mai tur, man khawm ila, talh mai ang u’ tih vel chu mipui lamin an comment zui dan a ni Thin.
Thuneitute hian a practical-in khapna dan hi han bawhzui se, khawlaia ui vak vel man khawmin action han la Thak Thak se, veng pali panga velah khauh taka dan kenkawh a nih chuan, dan hi kan zawm leh Thap maiin a rinawm. Dan zah tura kan inzirtir ngun teh lul nen hian, dan hi kenkawh zui a nih loh chuan kan lo zah tak tak thei lo a ni ber e.