Portugal an tling chiang

World Cup 2026 khel phak tura chak mamawh Portugal chuan an mikhual Armenia chu 9-1 ngawtin an sawp a, World Cup khel turin an tling chiang hle. Portugal rual hian England leh France in hnehna an chang ve bawk.
Captainn Cristiano Ronaldo tel lova inlan Portugal hian
Estádio do Dragão-a an mikhual Armenia lakah bul an tan tha viau a, Renato Veiga chuan inkhel tan atanga minute 7-na lekah hmahruaina goal a thun nghal. Hma takah goal an thun vangin phur viau mah se an phur rei bik lo. Minute 18-na lekah Armenia tan Eduard Spertsyan chuan goal thunin an si phurh a sut. He goal hian Portugal a ti tang sauh thung a, Armenia hian Sapui muthlu kaiharhin, an chhaih kawlh a ni ta ber mai a, goal riat ngawt an chhuah phah ta hial a ni.
Nations League champion Portugal tan hian Bruno Fernandes leh João Neves ten goal thum thunin hattrick an siam ve ve. Fernandes leh Neves ten goal thum ve ve an thun bakah hian Gonçalo Ramos leh Francisco Conceição ten goal khat ve ve an thun bawk a, an mikhualte hi 9-1 ngawta sawpin World Cup khel tura an mamawh point an hlawhchhuak.
Group F-ah hian khelh 6 atanga point 13 hmuin Portugal hi group champion an ni a, World Cup khel turin an tling nghal. Pahnihnaah Republic of Ireland an awm a, anni hian play-off an khel zui leh ang.
Pathianni zan khan Republic of Ireland hian an chunga awm Hungary chu an mualah an luhkhung. Mikhual an nihna hmunah si an phur reng a, minute 80-naah an si phurh an sut thei hram chauh. Play-off khel phak tur pawh chak ngei ngei mamawh Republic of Ireland tan hian Troy Parrott chuan minute 90+6-ah hattrick siamna goal a thun ta mai a. He goal hi chakpuiin Hungary an lehpel a, play-off khel turin an tling ta daih a ni.
Pathianni zana inkhel dangah World Cup khel tura tling chiang tawh England leh France ten hnehna an chang ve bawk.
Europe khawmualah World Cup 2026 khel tura tling hmasa ber England hian Mimualah Albania an hmachhawn a, Harry Kane goal hnih thun hmangin hnehna an chang. England hi an chak vek a, point 24 hmuin group champion an ni.
England rual hian France pawhin mikhual an nihna hmunah hnehna an chang ve bawk a, mualneitu Azerbaijan chu 3-1 in an hneh.