LADC inthlan boruak a nung

Lai Autonomous District Council (LADC) an inthlang dawn a, political party-te’n campaign rusum an thlak mek. Inthlan boruak a nung a, ngaihven pawh a hlawh.
Tun hnaiah Dampa bial by-election a awm a, LADC inthlanin a zui nghal. Kum tharah AMC inthlan a awm leh dawn bawk. Inhnaih te tea inthlan pathum a awm dawn vang pawh a ni thei a, tunlaiin Mizoramah politics boruak a nung a, LADC inthlan lo awm turah pawh boruak a nung.
LADC-ah hian December ni 3-ah vote an thlak dawn a, vote thlak hma darkar 72-ah dan pangngaiin campaign hun a tawp dawn. Campaign hun hi a tam tawh lo a, political party-te tan theihtawp chhuah hun a ni.
LADC-ah hian bial 25 a awm a, mi 80-in an chuh. State-a sorkarna changtu ZPM-in an chuh kim a, MNF-in bial 20 an chuh. Congress party leh BJP-in bial 10 ve ve an chuh. Independent ticket-a ding mi 12 an awm bawk.
MLA ding lai, Lawngtlai West bialtu C Ngunlianchunga pawh LADC inthlan lo awm turah hian a ding. MLA ni chungin autonomous district council-ah hian a din theih a, Tuichawng bialtu MLA RM Chakma pawh Chakma Autonomous District Council-ah MDC a ni. RM Chakma chungchangah hian larsap-in MLA leh MDC a nih kawp theih tiin a lo rel tawh a ni.
Lawngtlai atanga thu dawn danin, candidate-te leh party-te’n theihtawp an chhuak mek a, LADC huam chhungah inthlan hi titi a tling.
Independent ticket-a mi 12 an ding hian he inthlan boruak nunzia a hril tih an sawi a, LADC-a pa challang tak tak an nih avangin an thawm pawh a ring tih an sawi.
LADC-a an CEM hlui V Zirsanga pawh independent ticket-a ding zingah hian a tel a, ani hi ZPM atanga chhuakin independent-in a ding zui a ni. Mi dang pawh hi politics-a mi langsar an ni a, term liam meka MDC te pawh an awm nual.
Aizawl atangin party hrang hrang atangin campaign-in LADC-ah hian an kal a, party hruaitu liante pawh an tel. Inthlan boruak hi kar leh lamah a nung zual tura ngaih a ni.