A banna pawm lo mah se office la zawm lo

A banna pawm lo mah se office la zawm lo
Aizawl West I bialtu TBC Lalvenchhunga’n adviser to chief minister (finance) a nihna atanga banna a thehluh hnuah office a kai tawh lo a, chief minister-in pawm lo mah se office a la zawm lo.
TBC-a hian November ni 17, Thawhtanni khan banna a thehlut a, Thawhlehni-ah MLA thar lakluhnaah thuthar lakhawmtute zawhna chhangin chief minister-in a pawm loh thu a sawi. Mahse hemi ni leh a tuk Nilaini leh Ningani-ah pawh TBC-ah hian adviser to chief minister (finance) hna hi a la thawk lo.
A banna an la pawm loh avangin a office-a thawkte chu an kal tho a, amah erawh a kal rih lo tih thu dawn a ni.
Ningani-ah chief minister nen Lunglei-ah an zin dun dawn tih thawm a ri a, mahse an zin dun lo. Thu dawn danin, tour programme hi a hmaa lo duan sa a ni a, banna a thehluh tak avangin TBC-a hi a zin ve ta lo.
Adviser to chief minister (health & family welfare) Dr Lorrain Lalpekliana Chinzah pawh a bang dawn tih thawm a awm a, mahse hei hi a dik loh thu leh thuthang mai mai a nih thu Dr Lorrain-a chuan The Aizawl Post a hrilh; “Thuthang mai mai a ni. Ban ka tum lo a, chutiang ka ngaihtuah lo,” a ti.
Lawngtlai East bialtu MLA Dr Lorrain-a hi LADC inthlan lo awm turah ZPM candidate tur thlan danah a duh dan a tlang lo nia sawi a ni a, chutiang karah chuan adviser to chief minister a nihna atanga ban a tum nia sawi a ni. Mahse hei hi a dik lo tiin a sawi a, lungawi lohna a nei lo niin a sawi bawk.
LADC inthlana an party candidate tur thlan chungchangah “Kan hotute’n an tih apiang kha keini chuan kan pawm tur a ni a, tunah pawh ka pawm thlap e,” a ti a, a duh dan chu hotute bulah a sawi ngei a, chu chu a tlang lo a nih pawhin party-in tha an tih anga an rel chu a pawm mai niin a sawi.
“Mihring kan nihnaah ‘A va mak ve aw!’ han tih te chu a awm ve a. Mahse chuvang chuan ka lungawi lo chuang lo a, party-ah kan awm a nih chuan party thu kan zawm tur a ni a, lungawi lohna ka nei lo,” a ti bawk.