Luidung inkalpawhna tihhmasawn tumnaah Mizoram lui pathum a tel

Union minister of Ports, Shipping and Waterways Sarbananda Sonowal chuan Mizoramah luidunga inkalpawhna tha a awm theihnan Mizoram lui lian pathumah hma lak a ni dawn tih a sawi.
India Maritime Week 2025 puala November 21-a hun hmanah Inland Waterways Authority of India (IWAI) leh Assam sawrkar bakah private company-ten luidunga inkalpawhna tih hmasawnna tur project atana thawhdunna thuthlung (MoU) an ziahnaah he thu hi Union minister hian sawiin, Mizoram chu hmarchhak bial luidung hmasawnnaah a tel ve a, hei hian hmasawnna nasa tak a thlen dawn tih a sawi.
“Mizoram luidung zingah Tlawng lui leh Chhimtuipui (Kaladan) chu zirchian mek a ni a, hmanraw bunna atan Tlawng luiah cheng nuai 89 leh Chhimtuipuiah cheng vaibelchhe 1.42 ruahman a ni. Lunglei district-a Khawthlangtuipui leh Tuichawng inkar inkalpawhnaah cheng vaibelchhe 9.82 ruahman a ni a, he project hian lawng chawlhna hmun lian lo chi pahnih a huam tel dawn a ni,” a ti.
Luidunga inkalpawhna chuan ram thenawmte nena insumdawn tawnna kawng lian zawk a hawng dawn tih Sarbananda Sonowal hian a sawi a. India-in luidunga inkalpawhna tih hmasawn kawngah hmarchhak state-in hmun pawimawh tak a chang tih sawiin, tualchhung eizawnna kawngah pawh hmasawnna tam tak a thlen dawn a, kawng hrang hrangin heng biala mi chengte tan hamthatna a awm phah dawn tih a sawi.
Union minister hian a department chana hmalak dan thlirletpuia an thutkhawmnaah hmarchhak biala tunhnaia project lian hrang hrang 15 an thawh tur hi a sawi a. Heng zingah hian Mizoramah project pathum awmin, a dang hi hmarchhak state hrang hrangah thawh tur a ni.
Inland Waterways Authority of India leh Heritage River Journeys Pvt. Ltd. inremnaah hian luidung inkalpawhna tih hmasawn bakah heng biala luidung bula mi cheng hrang hrang chhawr tangkai tur ngaihtuah sak a tel a, zinmite hmuh nuam tur hrang hrang chhawp chhuah tum a ni bawk.