LADC inthlan boruak-in a vanglai thleng mek

Lai Autonomous District Council (LADC) inthlan lo awm turah campaign boruakin a vanglai a thleng mek a, candidate-te tan pawh mahni dinhmun a hriat theih ruak tawh ang, an ti.
December ni 3-ah vote an thlak dawn a, tun kar pawh campaign-na hun thawl a la ni. Chutih rual chuan a vanglai a thleng tawh a, tun karah pawh a vanglai hi la ni chhunzawm tura ngaih a ni.
Lawngtlai atanga thu dawn danin, bial a zim avangin party leh candidate-te tan mahni dinhmun tur inchhut hi a theih viau a, an campaign hrep tawh avangin kar hmasa lamah pawh khan a inchhut theih viau tawh.
“Candidate an han puang a, chumi rual chuan candidate chungchanga lungawi lote an lo awm a, chumi boruak thlir chuan thui deuh hi a thlir nghal theih thin a. An han campaign nghal a, theihtawp chhuaha an campaign hnu hi chuan mahni dinhmun tur a hriat ruak tawh ang. Chutiang chu a thleng tawh a, campaign vanglai hi kan thleng tawh,” tiin Lawngtlai-a chanchinbumi pakhat chuan a thlir dan a sawi.
LADC inthlanah hian vantlang inkhawm neih leh street campaign neih te an uar vak lo a, tun inthlanah pawh hian an uar lo tih thu dawn a ni. Aizawl atanga party hruaitu lawk kalte’n areopagi-a thu an sawi bak, Lawngtlai khawpuiah street campaign a awm lo tia sawi theih a ni. Zaithiam larte sawma rik luih luih pawh an uar lo.
Lawngtlai atanga thu dawn danin, bial a zim a, bial khatah voter an tlem a, mi an inhre chiang a, chhungkhat leh thenrual a pawimawh. Chuvangin LADC inthlanah hian house to house campaign a pawimawh a, chutiang chu tun tuma an kal dan pawh a ni. Candidate-te leh party te kar hmasa lamah chutiang chuan an campaign fe tawh a, chuvangin a vanglai a thleng tawh tia sawi theih a ni.
Chik deuhva thlirte tan chuan voter-te hawi lam pawh a hriat deuh ruak tawh a, mahni dinhmun hriat theih hun a ni tawh an ti. Tun karah campaign-na hun a la awm a, vote thlak dawn hnaiha campaign hi chu sa har beih hun a ni tawh an ti bawk.
Thingtlang lam leh Tuikuk leh Chakma khuaah chuan flag tar te pawh an uar a, Lawngtlai leh khaw lian deuhvah chuan an ti nasa lo tih thu dawn a ni.
Inthlan boruak a nung a, mahse mipui huapa rik hulh hulh lam ni lovin, a chhung lamah boruak hi a nung an ti.