Meghalaya-a India-Bangladesh ramri-ah zan curfew puang

Meghalaya-a India-Bangladesh ramri-ah zan curfew puang
Meghalaya-a East Khasi Hills district thuneitute chuan Thawhlehni khan India-Bangladesh ramri-ah zana curfew an puang a, hei hi dan lova thenawm ram atanga India-a lut leh hel pawl lut an awm thin nia hriat vang a ni.
Curfew hi zan dar 08:00 atanga a tuk zing dar 06:00 thleng zel tur niin ramri hrula ‘Zero Line’ siam atanga km khat huam chhungah thla hnih chhung kalpui a ni dawn tih thuneituten an sawi.
District Magistrate R M Kurbah chuan thuchhuah siamin ‘district chhunga international border thui tak hi a hungna a la tha lovin dan lova pem tumte tan luh mai theihna a ni a, hel pawl mite pawh an lut thei a. Dan lova thil tawlh leh mi sual pawl, ram tana pawi khawih theite tan pawh paltlang mai theih a ni’ tih a tar lang.
“Hetiang thil hi a thlen loh nan leh zana pun khawm a awm liih nan ‘Zero Line’ bul hnaiah district chhunga muanna leh venhimna tibuai thei a awm loh nan curfew hi puan a ni,” a ti.
Curfew chhung hian tute mah Bangladesh-a an luh emaw, lehlam atanga India ram chhunga an luh emaw phal a ni dawn lo tih thupekah chuan tar lan a ni bawk.
Dan lova mi panga leh a aia tam pun khawm te, ralthuam leh ralthuam atana hman theih kenga awm te, dan lo thil hrang hrang – ranvulh tawlh, ruihhlo ken, kuhvarah, kuhva hnah, sangha ro, sikret leh thingpui ken pawh phal a ni lo bawk.