MS kalpui tan thei dawn

MS kalpui tan thei dawn
Mizoram State Sports Council huaihawtin sports lama inkaihhruaina mumal zawk a awm theihna tur leh state pum dapchhuaka thalaite talent hai chhuahna tura sawrkar hmalakna ‘Empowering Mizoram Sports’ chu Thawhtanni khan Home minister K Sapdanga’n a khuhhawng.
Empowering Mizoram Sports (EMS) chu 2036 Olympic Games atana inbuatsaihna a nih bakah thalaite ruihhlo leh ngawlveina hrang hrang lak atanga chhanchhuahna tur peng pawimawh a ni dawn tih minister hian a sawi.
EMS programme hnuaiah hian kum 8-15 inkar basic coaching pek an ni dawn a, coaching hi ni 15 chhung atan nitin darkar 3, a vaiin darkar 45 pek an ni dawn.
Kum 8-15 inkar target an nih chhan hi, kum 2036-a taksa leh rilru that vanglai thleng tur ‘age group’ an nih vang a ni a. Mizote thiam zawng, 2036 Olympic Games-a India ram aiawha an tel ve theihna tur nia ngaih sports discipline 24 thlan niin, category thumah then an ni.
Category A-ah Archery, Badminton, Boxing, Hockey, Judo, Taekwondo, Weightlifting, Wrestling an awm a; category B-ah Athletics, Basketball, Football, Karate, Shooting, Table Tennis, Volleyball, Tennis; category C – Cricket, Cycling, Fencing, Kickboxing, Muaythai, Sepaktakraaw, Swimming, Wushu a ni.
A bultanna atan Category ‘A’ hnuaia sports discipline kalpui phawt tum a ni a, a tul dan leh fund awm dan azirin Category B leh C hnuaia discipline telh chhoh tur a ni.
EMS kalpui dan tur:
8 Coaching petu tur hi state-level sports association nen tanghoin kumin October khan trainer 73 thlan an lo ni tawh.
8 Public private partnership (PPP) mode-a kalpui tur a ni a. Sawrkarin coach leh sports equipment a tum ang. Coach duh khua/veng ten dilna an thehlut anga, a remchan dan angin, tumah duhsak bik awm loin coach-te tirh thin an ni dawn a ni.
8 Coach diltu khawtlangin coach-te veivahna (maxi cab fare), thlenna leh coaching an pek chhunga an ei leh in an tum ang. Hei hi khawtlangin neitu nihna rilru an put a, theihtawp an lo chhuah ve theihnana ruahman a ni.
8 EMS hnuaiah hian Mizo infiammi, Olympic-a tel thei tura talent leh thiamna nei bikte chu scholarship hmanga chhawmdawlna pek tum a ni.
8 EMS kalpuina atan Bana Kaih Scheme hnuaia ‘Participative Planning and Innovations for Sustainable Development’ component atanga Rs. 2,50,00,000 dah chu sanction a ni tawh.
8 EMS tha taka kalpui a nih theihnan consultancy firm – Angels Business Promoter nen thawkdun turin ruahmanna siam a ni a. Documentation, data, grading system, feedback pekna mumal tak nen kalpui tur a ni.
8 EMS hi phase wise-a kalpui a ni dawn a, phase-1-ah grassroots coaching /talent identification – ni 15 chhung training neih a ni anga, phase 2-ah hian phase 1-a training neite tan district leh state level inelna buatsaih a ni ang. Phase 3-ah phase hmasa pahnih atanga infiammi thlan bikte residential mode-a coaching/ training neihpui tum niin, an tih that dan azirin uluk lehzuala enkawl zui an ni ang.