Bana Kaih tawh zingah zaa 90-in thawk tha tawk
Bana Kaih tawh zingah
zaa 90-in thawk tha tawk
Mizoram State Policy Coordination Committee chu an chairman, chief minister Lalduhoma hoin Thawhtanni khan an thukhawm a. Bana Kaih Scheme kalpui zinga endik tawh chinah zaa 90 chuan an thawk tha tawka ngaih a ni.
Bana Kaih chu sawrkar flagship programme a ni a, department-ten an nitin hnathawhnaaah flagship scheme thil ngaihpawimawh hmasa zel thin turin chief minister hian a chah.
Thawhpui bank ho atangin loan component hnuaia loan dawng tura rawt tawh, tun thlenga la dawng lote dawn loh chhan sawi a ni a. Loan pek tawh 287, bawhzui mek 280 leh enthat tura bank-ten an thawnkir 113 an awm. Bana Kaih thawh hnihna a kal tawh dawn avangin a thawhkhatnaa la chinfel loh hi rang taka chingfel turin bank hi hriattir an ni.
Monitoring report hi AH & Vety, Horticulture, Fisheries, I&PR, LRS & WC leh Sericulture atangin dawn a ni tawh a, an endik tawh china zaa 90 vel chu thawk tha tawka ngaih an ni.
Animal Insurance Scheme (Livestock Insurance Scheme) hmalakna report a ni a. A thawh khatna atan ran 3300 vel huama (cover) kalpui phawt a ni ang. Tunah hian AH & Vety hnuaiah progress partner 1010 an awm mek a, a tam zawk hian vawk vulh an thlang a ni.
Animal Insurance hi National Livestock Mission hnuaia kalpui tur a nih angin, a guidelines ang chuan central leh state sawrkar tum tur bakah beneficiary contribution a tel thin a. Chutihrualin progress partner-ten insurance an tihna atana an tum ve tur hi Bana Kaih atanga tumsak nise, an ti.
Bana Kaih kaihhnawih:
8 Bana Kaih thawh hnihna atan loan component-a diltu mi 330 an awm leh mek a, nghak khawm loa endik nghal zel tur an nih avangin line department-te chu che rang tura chah an ni.
8 A thawh hnihnaah vek hian CM Special Package diltute dilna 570 endik tura thlan a ni tawh a, a diltu leh endik tura thlan zat hi nitin a danglam reng a. Dil hun hi a hrana hawn a ni tawh loa, englai pawha thehluh theih a ni.
8 Bana Kaih hnuaiah thawhpui bank tam zawk an awm theih an hmalak an rel a, a ranglama bawhzui tum a ni.
8 Cooperation department-in Bana Kaih hnuaia pawlin a dil theih loan dilna an thehluh project 18 chu an ngaihpawimawh dan indawt siam hmasa turin department hi chah an ni a, a tul anga bawhzui tura tih a ni.