National School Games Under 17 Taekwondo-in gold leh bronze 1 ve ve

National School Games Under 17
Taekwondo-in gold leh bronze 1 ve ve
69th National School Games Under 17 (Taekwondo) chu November ni 26 atang khan Arunachal Pradesh khawpui Itanagar-ah tan niin, vawiin, December ni 2 hian zawh fel a ni dawn a, Mizo team fehchhuakte’n gold medal pakhat leh bronze medal pakhat an hlawhchhuak tawh.
Mizoram atangin zirlai 13 kalin, team official pathum – Lalinpuia, Durjeet Singh leh Master Joseph Thansangate’n an hruai a; technical official-in Zohmingthanga, Albert Lalrinfela, Malsawmdawnga, B. Malsawmzuala leh Joseph Zodintharate an kal tel bawk.
Mizoram tana gold medal latu Vanlalthlamuanpuii, Children Guidance School zir lai chuan 1st match-ah Junior National zawh taka a hneh loh Madhya Pradesh aiawh hmachhawn nawn leh ngatin, tlawm nawn a tum lohzia game-ah a lantir a, 14-2, 4-3 hnehna changin round of 16 a inhlankai
Kerela player laka 7-0, 11-2 hnehna nen Nupuii hian quater-final a lut a, tah chuan Rajasthan aiawh laka 10-3, 7-3 hnehna nen semi-final lut lehin, Manipuri nena final luh inchuh game harsa takah pawh hnehtu zawkah bawk tang lehin, final-ah hian Gujarat player nen Under 55 kg huangah champion nih an inchuh a, game hmuhnawm takah 7-2, 4-1 hnehna nen Mizo tleirawl a champion ta a ni.
Mizoram tana bronze medal latu Elina Lalmuansangi, Govt. Mamawii High School zirlai hian Under 46 kg huangah khelin, a game hmasa berah CBSE naupang chu 4-3, 4-2-a hnehin round of 32 a in hlangkai a, tah hian CISCE bawk tum lehin, 3-1, 7-5 hnenna nen pre quater-final a lut a; tah hian NVS player lakah Mizo tleirawl hian first round la zo lo mah se second round leh third round lain a vannei zawkah tang.
Quater-final both-ah Chandigarh sikul naupang tum zui lehin, Sangi hian 4-2-in 1st round a la zet a, 2nd round-ah 5-7-in Chandigarh aiawh chak ve lehin, 3rd round-ah 8-6 hnehna nen Elina a tlang hram.
Semi-final lamah a thlengtu Arunachal aiawh nen game boruak sang tak, hmuhnawm bawk an khel a; first round-ah 12-8-in tualchhung tleirawl a ingchang a; second round-ah 8-6-in Elina a chungnung ve thung a; third round-ah 12-10-in Arunachal Praesh player a chak zawk tih puan a ni a, Mizo team hruaitute chuan an tum kha a thlengtu ni lo se Mizo tleirawl kha chak ngei tur a nih thu an sawi!
National School Games-a quater-final lut chinte hi nakkum Khelo Youth Games lo awm tur atan an tling nghal a; medallist-te bakah Mizoram atangin Khelo Youth Games machhawn tur hian Lalruatkima leh Danny Lalduhzuala an tling.