Chelsea laka Spurs chak vawi hnihna!

Chelsea laka Spurs chak vawi hnihna!
Kum 1990 February ni 10 khan Division One an tih hun laiin Terry Venables hoa fehchhuak Tottenham Hotspur chuan Stamford Bridge ngei maiah chutih laia Bobby Campbell-a enkawl Chelsea team chu 2-1-in an hneh a, kha mi hnu khan Blues khelmual league-a chak thei Spurs team an chhuah leh ngai tawh loh hnuah Inrinni khan kum 36 chhunga Chelsea khelmual hmingthang ngei maia hnehna hlawhchhuak thei north London team hmuh tur an awm leh ta a ni!
Tottenham chakna goal hnih hi a lut tlai raih ve ve a; goal hmasa zawk hi own goal ni nghe nghein, Chelsea goalkeeper Mike Penders chu corner ball-a Jan Paul van Hecke chhaihbuaina kara ball hnek chhuah tuma a zuanna lamah a chesual a, an lam goal-ah hnawl lut palh a.
Tun kha Everton an sut tuma a khabe ruh a tih-auh hnu lama league match bul a tan leh vawi khatna chiah a ni a, a vanduaina a kal tluang thei hle a ni.
Chelsea buaina belhchhah turin hun pangngai tawp hma minute 10 la awmah an player leh England midfielder ni bawk Cole Palmer chu yellow card vawi hnih hmuh tlin vangin hnawhchhuah a ni a, chu chuan an si phurh sut tuma tawpna nawrpui thlak an tumna kawngah mualneitu team tan a phel ni satliah mai loin goal khat dang an chhuah leh phahna tiin a sawi theih ang!
A yellow card hmasa zawk kha Mateus Fernandes laka a foul hrinchhuah niin, a vawi hnihna erawh Conor Gallagher laka a chetsual vanga hmu a ni thung.
Xabi Alonso team lama White Hart Lane club goal hnihna lut kha minute 87-a French forward Mathys Tel thawh a ni ve thung.
He London derby hi ruahsur hnuaia khelh niin, thli thaw vur vurin player-te a nuai bawk.
Season thar league-ah Spurs an talbuai hle a, tun kha match riat khelha an vawi hnih chakna chiah la niin, a hmasa zawk chu karliamta Thawhtannia an mikhual Coventry City laka 3-1 hnehna kha a ni.
Tun dinhmunah draw vawi thum neiin tum thum an tlawm tawh a; Inrinni zana an point thum hlawhchhuah hmangin table-ah 12-na an luah.
Stamford Bridge bika league match an khelh hnuhnung vawi 36-ah Tottenham kha vawi khat chiah la chakin, tum 24 an tlawm a, draw vawi 11 neiin, an chak awmchhun chu kum 2018 April ni 1-a Mauricio Pochettino hoa 3-1-a Antonio Conte enkawl Chelsea an hneh kha a ni.