Sawrkar hmasa huna hnathawh chhunzawm a nih dan an endik

Sawrkar hmasa huna hnathawh chhunzawm a nih dan an endik
MNF sawrkar kalta in hmasawnna hna a thawh tawh ho chhunzawm zel a nih dan chu MNF Thalai-in an endik.
MNF Thalai Hqrs. thuchhuah danin, Thawhtanni khan Lawngtlai Mampui-ah cheng nuai 5000 chuang senga sak mek Lawngtlai Didtrict Sports Complex chu khawtlang hruaitute leh YLA hotute nen a hmunah an en a. He sports complex-ah hian hostel, multipurpose hall, athletic tract, astroturf football ground, basketball hall, futsal ground, tennis court, volleyball court leh contact sports hmun bakah shooting range siam a ni a. Pavillion leh gallery siam mek a ni bawk.
YLA Mampui Branch chuan Sports Complex sakhmang chu a that a, kartin a huhoin an enpui ziah tih MNF Thalai hi an lo hrilh.
Sports minister hlui, Robert Romawia Royte MLA hoa thawkchhuak MNF Thalai chuan MNF sawrkarin sum sanction tifela bul a lo tan Lunglei District Sports Complex Rahsi Veng ami pawh an tlawh a. He Complex hi nuai 4900 senga sak mek a ni.
Lunglei Electric Veng-a MNF sawrkar ruahman, phullem field sak zawh tawh pawh an tlawh a. VCP hoin an lo dawngsawng.
MNF Thalai hian MNF sawrkar ruahmana Aizawl Smart City Ltd-in a sak Durtlang Football Ground chu a hmunah an tlawh tih an sawi a. Hna tha taka a kaltluan avangin lawmawm an tih thu a sawi.
MNF Thalai president Robert Romawia Royte chuan opposition a awm mek an nih angin, sawrkar kalsual tur ven chu an tih tur a ni a, sawrkar tih diklohah an dim dawn loa, sawrkar tihthatah chuan an thlawpin an fak thung dawn tih a sawi a ni.