MIZOFED-in NCEL thawhdun pui dawn

MIZOFED-in NCEL thawhdun pui dawn
Cooperation minister PC Vanlalruata uapna hnuaiah National Cooperative Exports Limited (NCEL) leh Mizoram State Cooperative Marketing & Consumers’ Federation Limited (MIZOFED) chuan Aizawlah thawhdunna thuthlung an ziak a. Mizorama agriculture sector leh a kaihhnawhten an thil thar ho ram pawna cooperative sector kaltlanga an thawnchhuah theihna tura hmalakna a ni.
NCEL managing director Unupom Kausik chuan Mizoram agricultural sector-a theihna inphum ru haichhuah tur a tam tih sawiin, NCEL chuan thiamna sang zawk leh midang nena thawhhona a lo neih sa hmanga he theihna inphum ru hi haichhuah a, Mizoram hausakna leh hmasawnna turin thawh ve a tum tih a sawi a ni.
NCEL hi kum 2023 khan Multi-State Cooperative Societies Act 2002 hnuaia din a ni a, India rama cooperative sector thil siam thawnchhuah kawnga hmahruaitu a ni. GCMMF (AMUL), IFFCO, KRIBHCO, NAFED leh NCDC leh cooperative pawl lian dangte hman lar niin, NCEL hi cooperative ho thil siamchhuah ram pawna thawnchhuah lamah a bul atanga a tawp thleng – lakkhawm (procurement), sawngbawl (processing), chhinchhiahna siam (branding) leh zawrhchhuah (marketing) kalpui tura thuneihna pek a ni.
MIZOFED hi Assam Cooperative Societies Act 1949 hnuaiah kum 1981-a din a ni a, Mizorama cooperative inzawmkhawmna sang ber a ni. District zawng zawngah POL, LPG leh mipui mamawh phuhruk leh sem hna a thawk.
He thawhdunna hian Mizoram tharchhuah pawimawh zual (flagship produce) – sawhthing, aieng, hmunphiah leh Mizo hmarcha thehlar kawngah nasa takin kawng a sial dawn tih sawi a ni a. NCEL thiamna leh thawhpui neih sa ho hmangin heng thlai thar hi ram pawna zawrhchhuah an nih chuan Mizoram tan hmasawnna tam tak a thlen dawn tih sawi a ni.