Assam leh Nagaland state din champha Lok Bhavan-ah lawm

Assam leh Nagaland state din
champha Lok Bhavan-ah lawm
Ek Bharat Shreshtha Bharat hmalakna hnuaiah Mizoram larsap Gen. Vijay Kumar Singh (Retd) hoin Ningani khan Lok Bhavan-ah Assam leh Nagaland state din champha ‘Foundation Day’ lawm a ni.
Larsap chuan Assam leh Nagaland state din champha pualin duhsakna a hlan a, state pahnih chu Mizoram ang bawka hnam ziarang leh danglamna ngah tak an ni tih a sawi.
Sawrkar laipui hmalakna – Ek Bharat Shreshtha Bharat programme chu India ram hnam ziarang leh nunphung hausa tak pholanna leh inhriatpawh tawnna tura buatsaih thin a ni, tiin, ram intodelh ‘Vikshit Bharat’ ni turin midangte hnam ziarang leh nunphung zir peih a, tanrual a, inunauna tha leh inhriatpawh tawn a tul tih a sawi a ni.
“Internet lamah thu dik tawk lo leh chi inthliarna lam hawi thu thehdarh a tam thin a, kan zavaia himna atan leh inpumkhatna atan Ek Bharat Shreshtha Bharat programme hi duan a ni,” Gen. Vijay Kumar Singh hian a ti a. Thalaite chu an kalna apiangah an hnam ziarang leh nunphung midang hriat leh hmuh theiha pholang tam turin a chah.
Assam larsap Lakshman Prasad Acharya thuchah ngaihthlak a ni a. Assam state aiawhin Assam Cultural Society president Prof. PC Kalita leh Nagaland state aiawhin Dr Bendangchuchang Longchar ten an state chanchin tawi an sawi a. Assam leh Nagaland chanchin pholanna video thlirho niin, Assamese, Naga leh Mizo zirlaiten hnam lam leh zai an entir a ni.