Bengal e-roll SIR draft list chhuakah vote nuai 58 paih
Bengal e-roll SIR draft list chhuakah vote nuai 58 paih
Inthlan hmabak, West Bengal-a electoral roll Special Intensive Revision (SIR) kalpuiah draft voter list tihchhuah a ni a, a hmaa vote nei thin mi nuai 58 paih an ni.
An hming paihsak mi nuai 58 zinga nuai 24 chu ‘thi’ tia chhinchhiah niin nuai 19 chu ‘awmna hmun sawn’ tih an ni a, nuai 12 chu ‘chin hriat loh/bo’ tia dah niin nuai 1.3 chu ‘lem’ tia dah a ni.
Draft list tihchhuah a nih takah hian SIR kalpui mek thawh khatna chu a zo ta tih a ni a. List-a hming chuang ve lo, chuang ve ngei tur site chuan an tel theih thu leh siam thaa telh turin an thlen theihna hun hawn a ni dawn a. Hetianga dilna thehluh hi ngaihtuaha chin fel a nih hnuah final list chu February-ah tihchhuah tur a ni ang.
Final list tihchhuah a nih chuan a hnu lawkah assembly inthlan puan mai a nih a rinawm tawh a. Bengal-a SIR kalpui hnuhnung ber chu kum 2002 kha a ni.
Draft list tihchhuah a nih takah hian SIR kalpui duh lo tam tak an awm sa avang leh hming tel lo tam tak an awm bawk avangin politic-a inbeihna lian tak a awm zui ngei rin a ni a. Chief minister, Trinamool Congress chief Mamata Banerjee-i chu SIR kalpui duh lotu langsar niin sorkar laipui leh election commission chu inthlan hmaa SIR hmanga vote nei thei reng mi nuai tel paih tumah a puh a ni.
Tun thla tira Krishnanagar-a vantlang inkhawma hun a hmannaah pawh Banerjee-i hian mipuite chu an hming a chuang lo a nih chuan kawtthleah chhuaka lungawi lohna lantir turin a ti a. “SIR hmangin nu leh farnute dikna chanvo chu chhuhsak in ni dawn em ni? Inthlan laiin Delhi atangin police hruaiin nu leh farnute tihhlauh an tum a. In hming a awm lo a nih chuan hmanrua in nei a ni lo’m ni? Ei in siam laiin in hmanrua chu in hmang a, chakna in nei a. In hming hi paihtir phal suh u, hmeichhiaten hma kan hruai ang a, mipate chu a hnungah an awm ang,” a ti.
Hetih lai hian BJP chuan Banerjee-in SIR kalpui a duh loh em em chhan chu amah leh an party vote-tu ber, dan lova India-a lutte hum a tum vang niin an sawi a. “Mamata Banerjee-i hian thi tawh, lem leh dik lova vote neite paih an nih chuan thuneihna a chan theih tawh loh a hlau a. Trinamool hian BJP aiin vote nuai 22 chauhvin an hmu tam a ni,” tiin Leader of the Opposition Suvendu Adhikari-a chuan a sawi.
Trinamool Congress hian a hma pawhin election commission hi SIR kalpui avanga hna an ngah lutuk avanga Booth Level Officer (BLO) intihlum tam tak an awm chungchangah a lo dem tawh.
Draft list a chhuah leh hnuah Banerjee-i kaihhruai party hian thawm an neih ngei beisei a ni.