India-in a hma thla aiin August-ah Russian tuialhthei lei tlem

August thla chhung khan Russia-in India hnena tuialhthei a hralh chu a tlahniam a, hetih lai hian Abu Dhabi National ​Oil Co (ADNOC)-in Strait of Hormuz kaltlang lova tuialhthei a hralh avangin Middle East atanga a lak luh a pung ve thung tih chhinchhiahna atangin a lang.
United Arab Emirates-a sorkar hnuaia mi, ADNOC hian an thawn chhuah an tipung a, Strait of Hormuz huam chhunga an oil field atanga tuialhthei an lak chhuahte chu Fujairah leh Sohar-ah dah khawlin an hralh chhuak leh thin a ni.
Anmahni ta thlitfim loh an dah khawl bakah ADNOC hian an thenawm ram, Iraq leh hmun dang atangin hralh chhawn turin an leisak bawk.
India chuan August thla khan Russian tuialhthei a lak luh chu a hma thla aiin 16.5%-in a tlem zawk a, ni khatah barrel maktaduai 2.1 chuang hret a la lut tih sumdawnnaa thil che vel chhinchhiahnaah a lang a. Russia hi India-in tuialhthei a lak luh tamna ber rawm erawh a la ni reng a, a dawtah UAE leh Venezuela an awm.
Khawvela tuialhthei la lut tam pathumna ram hian Iraqi tuialhthei a lak luh zat chu a hma thla aiin hmun lia thena hmun khat chuangin a tam a, ni khatah barrel 1,71,000 chuang la lut ang a ni.
UAE atanga a lak luh erawh July thla aiin 5.4%-in a tlem ve thung a, ni khatah barrel 6,20,000 a la lut a. Hormuz pawn lam lawng chawlhna atanga thlitfim loh pe chhuak thei, Saudi ​Arabia atanga a lak luh chu 1.5%-in a pung ve thung a, ni khatah barrel 3,28,000 a la lut thin.
India hian US-Iran inkar tha lo vanga Strait of Hormuz khar a nih atangin Russian tuialhthei tam zawk a lei tan.
Hetih lai hian Kpler-in an chhinchhiah dan leh an chhut lawk dan chuan September thla kal mekah pawh hian Russian tuialhthei a lak luh pawh hi tlahniamin ni khatah barrel maktaduai 1.9 chauh a la lut dawn niin an sawi.
Indian thlifimtute chuan US President-in Russian tuialhthei an lei avanga chhiah 100% laksaka a vauna chuan India puma eibar a nghawng theih an hlauh avangin October leh November ​thla lo awm turah pawh hian Moscow atangin an lak luh tlem rin a ni a, hmun dang dangah, a remchang an zel dapa an lei mai rin a ni.
Washington nena sumdawnna inremna siam tuma indawr mek, New Delhi chuan a mite hnenah energy-ah hlauhthawn tur a awm lo tih a sawi reng a, sumdawnna leh boruak inthlak azir zelin lak luhna a dap zel tih a sawi a ni.
Chhinchhiahnaah chuan India hian August thla khan tuialhthei a la lut tlem hrim hrim a, a hma thla aiin 8.8%-a la lut tlemin ni khatah barrel maktaduai 4.44 chauh a la lut a ni.