James Cameron billionaire a ni ta

Hollywood director James Cameron chu official takin billionaire a ni ta a, a hausakna hi dollar tluklehdingawn 1.1 angin an chhut. Cameron hi a bul tanna chu a ropui teh lua bik lo a, truck driver atanga bul tan niin, film siam lamah a kal a, a kal fuh ta hle a, entertainment khawvela billionaire tlemte zingah a tel ve ta a ni.
James Cameron hi kan hriat Leonardo DiCaprio leh Kate Winslet te channa ‘Titanic’ film siamtu kha niin, hei bakah hian ‘Avatar’ pawhin khawvelin a tuipui hle a ni. A film siam dang ‘The Terminator’ leh ‘Aliens’ te pawh khawvela film hriat hlawh leh hlawhtling tak tak vek an ni. Forbes chuan Cameron hausakna hi dollar tluklehdingawn 1.1 angin an chhut a, ani hian sum hai luhna dang a nei chuang lo a, a film siam hlawhtlinna chu a sum hmuhna lian ber niin, box office lama a hlawhtlinna chu a billionaire pui ta a ni.
Tunah hian a film siam ‘Avatar: Fire and Ash’ tlangzarh tur a la nei a, he film atang ringawt pawh hian dollar maktaduai 200 tal chu hlawh leh ngei tura chhut a ni. A film siam hrang hrang ten cinema hall ticket hralhna atanga an sum thawh chhuah zawng zawng belhkhawm pawh dollar tluklehdingawn 9 a kai thuak tawh a ni.
Cameron hausakna hi a la pung leh ngei dawn a, ‘Avatar: Fire and Ash’ hi box office-a hlawhtling ngei tura rin a ni a, khawvel huapin cinema ticket hralhna atangin dollar tluklehdingawn 2 vel la lut thei turin an chhut hial a, he film atang hian Cameron hian dollar maktaduai 200 vel chu hlawh thei ngei turin an chhut bawk.
James Cameron hi college kal ve zuai, mahse, kal chhuak ta lo, truck driver ni ta a ni a, chutah Roger Corman-a New World Pictures-ah production assistant hna a thawk leh a, he hna a thawh lai hian kar khatah dollar 175 a hlawh thin.
A film direct hmasak ber cu 1981-a ‘Piranha II: The Spawning’ kha a ni a, mahse, an chhunzawm tir lo, an ban zui nghal daih. Tichuan 1984 khan ‘The Terminator’ film rawn siamin, khawvelin a hmelhriat ta tak tak a ni. He film script hi producer Gale Anne Hurd hnenah dollar 1 lekin a hralh a, mahse, amah ngeiin a film chu a direct tur a ni, tiin a kar ve thung. ‘The Terminator’ hi an siam laiin dollar maktaduai 6.4 an seng a, dollar maktaduai 78 a hmuchhuak thei a, a film chhunzawmna an siam ta zel a, tunah chuan Terminator film hrang hrang sum lak luh hi dollar tluklehdingawn 2 chuang a ni tawh. Terminator hnuah ‘Aliens’ a hlawhtlinpui leh hle a, chutah ‘The Abyss’ leh ‘Titanic’ te siamin, ‘Avatar’ franchise pawh khawvelin a tuipui ta hle a nih hi.