Cardi B sana thar manto

Hmeichhe rapper Cardi B chuan a kum 34 tlin lawm nan amah leh amah thilpek hlu zet mai a inpe a, Barbie Rolex Daytona senno a in-present a, he sana hi dollar maktaduai thum man a ni!
Cardi B chuan a sana thar thlalak hi Instagram lamah post-in, a caption-ah, “Belcalis hnen atanga Cardi B dawn…keimah leh keimah gift ka inpek! @Mavani hetiang sana ram tina min zawn kual sak avangin ka lawm e, Rolex-in an nemnghet thlap lehnghal. Chuan, @pristine_jewelers pawh zungbun min siam sak avangin ka lawm e…7 karat natural diamond ka tan liau liau a siam,” a ti.
Tlereuh lama sumdawng Mavani hian Cardi B sana tur hi an zawng kual nasa hle a, hetiang sana hi khawvelah 10 chiah a awm niin an tarlang a, tuna Cardi tana an lei hi zawrh lai awm chhun a ni nghe nghe a, chu pawh chu Rolex lamin a dik tak a ni ngei tih an nem ngheh sak thlap bawk.
Cardi B chuan, “Khawvel hmun tin min dap sak avangin ka lawm e. Ka tihbuai zia che u ka ngaihtuah hian lawmthu sawi lo thei ka ni lo, mahse, ka mi rin theih ka mamawh miau si a. Khawih danglam leh midang sulhnu tel lo, company kutchhuak chiah ka duh si a. Ka thawkrim bawk a, chutiang chu ka phu ve alawm,” tiin video clip a post bawk.
Cardi hian a pianchampha lawm nan a la duhtawk mai lo, seven-carat diamond zungbun leh Hermes Mini Kelly bag senno, a sana thar nena inmil tur a lei tel bawk.
October ni 11 a kum 34 a tling ta Cardi B hi kuminah hunawl nei mang loin a vir buai hneh khawp mai a, ama pual arena tour hmasa ber neiin, sum pawh a rut malh malh viau a, MTV VMA-ah kan best hip-hop a dawng a, BET Awards a dawn bakah November thla hian Billboard Canada-in Global Woman of the Year award an hlan leh dawn bawk a ni.