Dan loa wine siam a man theih Rakzu that loh dan enfiah mek: – Excise minister

Dan loa fruit wine/ local beer siam chu man theih a ni a, zawldawh tak chungin siam leh zuar lo tura hrilhin an la ngaichang mek tih Excise minister Lalnghinglova Hmar chuan a sawi a. Tualchhung zu (rakzu) mihring tana a hlauhawm dan chu laboratory-ah mithiamte an endik tir mek tih a sawi bawk.
Excise & Narcotics minister Lalnghinglova Hmar chuan zu khapna dan siamthatna – The Mizoram Liquor (Prohibition) Amendment Act 2025 hnuaiah grep bakah Mizoram thar thlai leh theirah thlanchhuah bik hmangin local beer/ wine siam theih a ni a. A siamchhuah leh zawrh chhuah dan pawh mumal leh tha zawka kalpui tum a ni tih a sawi.
“A hman hmanin an siam mai chuan a dik dawn loa, in atan a him tawk em, alcohol content engzat nge tih leh endik ngai dang enpui turin Excise commissioner kaihhruai Selection Committee din a ni a. Winery/ brewery leh stockist thlengin an endik thin ang,” a ti.
Thuthar thehdarhtute zawhna chhangin Excise minister chuan, dan hnuaia phalna la loa fruit wine/ local beer siamtute chu report/ complaint an dawn chuan man theih reng an ni a, chutihrualin, kuthnathawktute hmakhua ngaihna avangin inman rup rup nghal mai loin, siam leh zuar lo turin a ngena ngen an la ni rih tih a sawi.
Zawhna chhangtu Excise commissioner chuan, danin thei/ thlai a phal ho kha a thar hun a pel tawh viau laiin, tun thlengin fruit wine/ local beer siam leh zawrh phal dilna an la dawng lo tih a sawi.
Zawhna dang chhangin minister chuan, tualchhung rakzu chu mihring tana a hlauhawm dan endik tirin laboratory-ah a sample an thawn a, tum hnih an thawn tawhah a result a inang lo hle tih a sawi. “Pakhatah chuan hlauhawm deuh niin result a chhuak a, pakhatah chuan a hlauhawm nep leh deuh lawi si a, thulai lak a har avangin a tum thumna atan endik tir leh mek a ni,” a ti.