Shilpa Shetty te nupa an buai zual dawn

Shilpa Shetty te nupa an buai zual dawn
Bollywood star Shilpa Shetty Kundra leh a pasal Raj Kundra te lakah Mumbai Police hnuaia Economic Offences Wing chuan Section 420 of the Indian Penal Code hnuaiah inbumna thilah FIR an ziak lut leh ta. Shilpa Shetty Kundra leh a pasal Raj Kundra te hi an company hlui Best Deal TV a cheng vaibelchhe 60.48 loan-cum-investment deal chungchanga inbumna, thubuaia chhui mek an ni a, police ten an chhuinaah hian thil thar hmuh belhin, case an ziah belh leh ta a ni.
August thla khan Economic Offences Wing hian Shilpa leh Kundra te hi IPC section 403 leh 406 tlawhchhanin inbumna thubuai an lo siam sak tawh a. Mumbai-a sumdawng, Deepak Kothari chu cheng vaibelchhe 60.48 lawihin an bum niin puh an ni a, an lakah FIR ziah luh a ni.
Shilpa leh Kundra te hian an lak FIR ziah luh chu Bombay High Court-ah an khing let a, tanchhan tur engmah awm mumal lo leh dik lo taka inpuhna niin tan an khawh ve thung a. Sumdawnna kal fuh lo a mimal kar thil ni a sawiin, dan bawhchhiatna engmah a awm lo, tiin case tih tawp an ngiat ve thung.
He case intanna chu Deepak Kotari FIR a ni a, ani hi Lotus Capital Financial Services-ah director a ni a. Raj Kundra leh Shilpa Shetty te hian an sumdawnna huang zauh nan tiin sum an thawh tir a, mahse, Kundra nupa hian an sum puk chu company tana hmang lovin an mimal mamawhah an hmang ta zawk niin a puh a, an company hi a tlachhe zui ta bawk si a ni. He puhna hi Kundra nupa te hian an pha ve thung.
Police ten an chhuinaah Look Out Circular (LOC) chu Raj Kundra leh Shilpa Shetty te lakah an tichhuak ta a, hei hi India an chhuahsan loh nana an tih a ni. Hetianga an laka LOC tihchhuah a nih chungchangah hian Bombay High Court-ah an zualko a, mahse, Bombay High Court chuan an laka LOC hlih an duh chuan cheng vaibelchhe 60 deposit emaw chuang zat sum awmna bank guarantee theh lut turin a lo ti ta zawk a ni.