Oil depot din dan tur sawikhawm

FCS&CA minister B Lalchhanzova chuan 2025 December 29 khan Indian Oil Corporation Limited hotute leh FCS&CA hotute nen Mizorama oil depot siam theih dan tur an sawiho.
FCS&CA minister chuan Mizoram mamawh pawimawh tak a ni tih hriain an sawrkar tirh atangin theihtawp chhuahin oil depot bun theih dan an dap nghal a. Chief minister-in DO letter hmanga a bawhzui bakah Delhi lama hotute pawh an be pawp reng tih a sawi.
2025 December-a Union minister for Petroleum Hardeep Singh Puri nen inhmuh an tum chu Parliament thlasik thutkhawm nen a innan tak avangin Ministry of Petroleum and Natural Gas (MoPNG) chuan Mizorama oil depot siam chungchang hi official level-ah meeting an ko a. 2025 December 11 khan FCS&CA secretary Teresi Vanlalhruaii chu thutkhawmah hian a tel a; Mizoram-in oil depot a mamawh chhan hrang hrang a thlen. MoPNG-in Mizoram sawrkar mamawhna leh ngenna chu zirhoa sawiho tur a tih angin, hemi tihhlawhtlin dan kawng dap turin IOCL hriattir an ni a, tun tum thutkhawm hi a hrinchhuah a ni tih a sawi.
Mizoram chu a awmna hmun a pawimawh avangte, ruahtui tlak tamna anih avanga inkalpawhna a harsatna a awm thin vangte, KMMTTP kal zelah South Asia politics boruak inlumlet avang leh chhan dang dang vangin energy security a neih a tul hle tih B Lalchhanzova hian IOCL hotute a hrilh a. Mizoram sawrkar chuan a tih theih leh tih ve tur chu theihtawp chhuaha an umzui tur thu hrilhin, tha thlah loa tan la chhunzawm turin FCS&CA leh IOCL hotute chu a chah tih a sawi a ni.