Chhim lama ramri khar January 11-a hawn tum

Chhim lama ramri khar
January 11-a hawn tum
Myanmar nena inrina lam atanga tuihri leng rawn lut nia hriat avanga Lawngtlai district-a ramri khar chu January 11 hian hawn theih tawh beisei a ni.
Lawngtlai district bawrhsap Donny Lalruatsanga chuan, ramri khar mek chu natna a darh lohna tur a ni, tiin, inkaihhruaina fel tak siamin, January 11 atanga hawn theih beisei a ni tih a sawi.
An district-a tuihri leng chu a ziaawm tawh hle tih sawiin, venthawn thilah erawh he hri rawn putluhna ber nia hriat Myanmar ramri chu khar a la ni a. Chutihlaiin thla hnih khar tur tih chu pawh tawi a ni dawn tih a sawi a ni.
Tarlan tawh thin angin, Lawngtlai district-a Kakichhuah khuaah 2025 November khan tuihri avangin mi 6 an thi a, December thla chawhnu lamah 4 an thi leh a, a vaiin mi 10-in nunna an chan phah a ni. Hei vang hian Lawngtlai bawrhsap chuan December 23 khan thla hnih chhung atan Myanmar ramri khar thupek a chhuah a ni
Siaha district-ah pawh Myanmar nena inrina lamah bawk tuihri hi a leng a, ramri khar rih a ni. Siaha district-ah hian 2025 November khan tuihri avangin mi 3 an thi a. December chawhnu lamah Lomasu, Lodaw, Lopu leh Khaikhy khuaah a leng leh a, nunna chan erawh an awm lo.
Thudawn danin ramri khar lai hian Myanmar lam atanga sumdawnga lo lut an awm loh avangin Mizoram atanga bungraw hralh tura kal dan vek an ni a. A ruka kawng danga kal an awm a nih loh chuan insumdawnna atana kawng hman pui ber chu khar a ni.