Higher secondary thlengin Braille hmang
Higher secondary thlengin Braille hmang
‘Mitdel hawrawp’ tia sawi Braille chu Mizoram sawrkarin elementary atanga higher secondary thlengin school textbook a print tawh.
Mizoram Blind Society (MBS) hruaitute sawi danin, tunhma chuan mitdelte tan lehkha zir a harsain a hautak thin hle a. Tunah erawh Mizoram sawrkara SCERT leh MBSE hmalakna azarah elementary atanga higher secondary thlengin mitdel hawrawpin school textbook print vek a ni tawh a.Hei bakah hian Social Welfare, Tribal Affairs, Woman and Child Development department hmalakna azarah Mizoramah mitdel hawrawp chhutna – Braille Press a awm tawh a. Hengte hian Mizorama mitdel zirlaite tan hmasawnna tam tak a pe tih an sawi a ni.
Tunah chuan Braille chauh ni tawh loin, screen reading software hmangin mitdelte tan computer a ‘operate’ theih a. Smart phone pawh talking software hmangin mitdelten anmahniin an operate thei vek tawh tih an sawi bawk.
Mitdelten Braille hmanga lehkha an zir hian an tana syllabus hrang engmah a awm loa. Braille alphabets an thiam hnu khan elementary atanga post graduate leh a dangte an zir thlengin mitvar pangngaite zir ang vek tho an zir a. Zirna in, a bikin college leh university-ah phei chuan mitvar pangngai zingah class an kal ve vek tih MBS hruaitute hian an sawi a. Mitvar pangngai nena a danglamna chu, an mita lehkha ziak pangngai an hmuh theih loh avangin mitdel hawrawp hmangin an classmate mitvar pangngaite zir apiang kha chhiarsaktu (reader) la in an lo copy zel thin tih an sawi a ni.
Mizoramah hian mitdel school hmasa ber chu 1977 April 15 khan Chhandamna Sipai Pawl-in Kolasib-ah an din a. Tun thlengin mitdelte tana zirna in tha tak leh belhfakawm tak niin, he school atanga lehkha zir hlawhtlinga sawrkar hna thawk mi 25 an awm tawh tih sawi a ni.
Kum 2000 hnulam khan Mizoram hmun dangah pawh blind school dang din a ni ta zel a. Tunah hian Mizoramah mitdelte tana zirna school tha tak pahnih – The Salvation Army Integrated English Medium School For The Blind Kolasib-ah leh Special Blind School Durtlangah a awm. Heng blind school-ah hian mitdel tan elementary atanga higher thlengin a thlawn vekin hostel facilities nen pek a ni.
Tunah hian Mizoramah Braille hmanga lehkha zir mitdel mi 20-in BA an pass tawh a, mi 10-in MA zo tawhin, pahnihin M.Phil an zo tawh a, mi pahnihin M.Ed an zo tawh. Mi 8-in B.Ed an zo tawh a. Tunah hian BA, B.Ed leh MA zirlai an awm mek bawk. Mitdel zirna lama hlawhtling tawh, mi 30 velin sawrkar hna thawkin chhungkua an chawm mek tih MBS hruaitute hian an sawi.
January 4 kha khawvel huapa mitdel hawrawp hman tan ni – World Braille Day a ni a. He ni pual hian Mizoram Blind Society chuan Mizorama mitdel zawng zawng, anmahni enkawltute, Mizoram sawrkar hotute leh Zoram mipui duhsakna chibai an buk tih an sawi a ni.