Foreigner khuahkhirhna fel zawk siam rawt dawn

Foreigner khuahkhirhna
fel zawk siam rawt dawn
Lawngtlai district huamchhungah foreigner chungchanga inkhuahkhirhna felfai zawk siam tum a ni a, state sawrkara thehluh a ni dawn tih an district bawrhsap Donny Lalruatsanga chuan a sawi.
Lawngtlai bawrhsap hian Thawhtanni khan chanchinbumite a kawm a. Lawngtlai khawpui hmasawnna tur duan mek zingah traffic chungchangah hmalakna liantham neih tum niin, foreigner chungchangah inkhuahkhirhna felfai zawk siam a, state sawrkara thehluh a ni dawn tih a sawi.
Faina kawnga Lawngtlai khawpui chhung veng hrang hrang inelna ‘Bawrhsap Award’ chu kumin Republic Day-a sem a ni dawn tih a sawi a. Project lian zawk siam tumna – Cheural Tlang (Khaw za lang tlang) Paithar Tlang, Ditlang hming put chhan Dil hmachhawpah dah a ni tih a sawi a ni.
Hunpui laiin an district-ah buaina leh harsatna liantham a awm lo chu police, NGO, kohhran leh mipui inkarah thawhhona tha tak a awm tih sawiin, kum tharah hmasawnna tha zawk nei turin a hlan.
Lawngtlai senior SP PC Lalchunglura chuan hunpui laiin dan leh thupek kenkawh kawngah harsatna liantham a awm lo a. NGO nen thawhhonna a tha tih a sawi. Hunpui lai hian an district pumah case 4 chiah ziahluh a ni tih a sawi a ni.
SP sawi danin, kum 2025 chhung khan Lawngtlai district-a police station-ah case 65 ziahluh a ni a; kum 2024 aiin case hi a tlahniam. Operation Jericho kalpui vangte, NGO leh MJA nena thawhhona tha avangin case ziahluh ngai a tlem zel a beisei tih a sawi a ni.