Assam-a bial 126-a bial 103 kan la ang – Sarma

Assam Chief Minister Himanta Biswa Sarma chuan March-April vela an state assembly inthlan turah rore lai, BJP leh an thawhpuite, National Democratic Alliance (NDA) chuan bial 126 awmah bial 103 zet an lak theih hmel tih a sawi.
“A zat chiah chu ka sawi thei lo va; mahse, tun tumah hian bial 103 lak theihna kan nei a. A hma khan 90 vel a ni a; mahse, tunah hian bial thenkhat siksawia tihzim a nih avangin 13–15 velah a pung dawn a ni,” tiin Sarma hian Pathiannia Dimoria, Kamrup Metropolitan district-a hun a hmannaah a sawi.
Hetih lai hian All India Congress Committee (AICC) general secretary-in Inrinni zan tlai tawh taka hriattirna a tihchhuahah an party hruaitu, Priyanka Gandhi Vadra-i chu screening committee chairperson atan ruat a ni tih tar lan a ni bawk.
Election Commission (EC) chuan Assam-ah hian August, 2023 khan assembly bial 126 leh Lok Sabha bial 14 siam rem (delimitation) hna hi a lo thawk zo tawh a, bial ramri tam tak rin that a ni a. Hetih hun lai hian BJP chuan ramri siam that hian an state-a ram leilung fate tan bial tam zawk lak theihna kawng a hawng dawn niin an sawi a ni.
“BJP leh a thawhpuite hian bial 103-ah hian thapuiin inthlan kan chuh ang a. A dang bial 23–24-ah chuan chakna chance kan nei tha lo hle a, hengah pawh hian kan chuh tho dawn a. Bial 103 bikah hi chuan kan bei ang a, voter-te pawhin bial 100, 90, emaw 80 emaw min pe ang,” tiin Sarma chuan a sawi.
BJP hi Assam-ah hian regional party pathum — Asom Gana Parishad (AGP), United People’s Party Liberal (UPPL) leh Bodoland People’s Front (BPF) an thawhpui a. Bial dinna tur insem dan turah eng inremna mah an la siam rih lo.
Hetih lai hian Assam Congress President Gaurav Gogoi-a chuan bial 100-ah an chuh dawn tih sawiin a dang 26 chu an thawhpui – Raijor Dal, Assam Jatiya Parishad leh CPI(M) dinna turah an dah dawn a. Gogoi-a hian All India United Democratic Front (AIUDF) chu eptu tangrualah hian an tel ve dawn lo tih a sawi bawk.