Hruihrual chhungah Fury kirleh dawn!

Hruihrual chhungah Fury kirleh dawn!
Professional boxer hming lawk chin dang engemawzat ang bawkin British heavyweight boxer Tyson Fury pawhin boxing a chawlhsan tawhna atanga hawikirin ring chhunga inhnek a tum leh thu a sawi chiang.
Two-time heavyweight champion Fury hian fight tum 37 a hmachhawnah vawi hnih chiah tlawmin, draw vawi khat a nei bawk.
Heavyweight world champion hlui Briton hi hruihrual chhunga a luh tawpna chu December 2024 heavyweight rematch-a a tum hnihna atana unified champion Oleksandr Usyk a hneh loh leh tum kha niin, kha mi atanga thla khat a liam leh rualin boxing inelna chawlhsan thu a puang a, tunah kumina hruihrual a luh tur thu a puang zui leh ta mai a ni.
Kum 37-a upa Fury hi tunhnai chawlhkar engemawti chhung khan boxing-a kirleh tura sawirik a ni reng a, a chhan pawh social media lamah Thailand rama South African boxer Kevin Lerena nena an training lai video hlimthlate a tichhuak a, kirleh dawn lo se khati khati tur kha ni theiin an ngai lo a, kum a thar fel rualin a chawlh puan tawh a hnuhkir thu a puang zui ta mai reng a ni.
Tun Pathianni khan Instagram lamah post siamin Fury chuan: “2026 ngei hi ka kir hun tur chu a ni e. Ka han vak bo zuai nain tunah chuan ka kirleh ta. Kum 37 mi ni chungin ka la hnek ve thei chiang alawm. Mipa hmai ngi maia han hnek siah iah tluka anhla hi a awm thei lo a, chu mi tur erawh chuan a man kan pek ve a ngai thung thin,” a ti.
Tun hi Tyson Fury vawi khat kirna a ni tawh lo. Pathiannia a kir tur thu a nemngheh hma khan rilru lama harsatna a tawh thu sawiin kum hnih leh a chanve chhung ngawt hruihrual atangin a lo kalbo tawh a, kum 2018-ah kirin kum 2020 khan Deontay Wilder hnehin WBC title nen world champion nihna a luahkir.
April 2022 khan Wembley Stadium-a Dillian Whyte a hneh hnu lawkah a chawlh thu a puang leh ta thut a, mahse, kha mi tum pawh khan a lung a leng leh ni ngei tur a ni thla ruk lek hnuah hruihrual a lut zui leh mai bawk a!
Queensberry promoter Frank Warren chuan Fury inhnek leh a beisei thu hi a lo sawichhuak tawh a; Saudi Arabia powerbroker Turki Alalshikh pawhin Fury leh a hmelma ni rei tak Anthony Joshua-te chu kum 2026 tir lam hian Saudi thlaler lalram (Kingdom)-ah ngei an inhnek a rin thu a lo sawi tawh bawk.
He thu hi a awihawmna chu nikum December thlaa Jake Paul a hneh hnu lawk khan Briton mihang fighter Joshua hian a lehpeka Fury hmachhawn a inpeih thu a sawi tlat a ni!
Hetih lai hian tun hunpui lai mai khan Nigeria rama car chesualah Joshua hi a inhliam hlauh mai a, a chuanpui leh a thian hnai tak ni bawk pahnihte chu kha car accident-ah khan an thi nghe nghe a nih kha.
A tum thumna atana hruihrual chhunga kirleh tur Fury chuan tum hnih lai heavyweight champion lawm boruak a lo hap ve tawh kha a ni a; a career-a vawi 34 a chak tawh laia a tlawm awmchhun pahnih kha Usyk lakah ve ve niin, Wilder nen an inhnehtawk tawh bawk.
Tyson Fury lo lan hma khan Klitschko unau Wladimir leh Vitali Klitschko-te khan heavyweight boxing an tiho zo vek hman a!
Kha Ukrainian unau khan heavyweight division-a an tumpui apiang an tukdawl hmiah hmiah mai a, an chhungte nawrna avangin an unau lah kha an inhmachhawn duh ma lek a, heavyweight bout a boring hman!
Chu tah, kum 2015 a lo her chhuak a; an career-a Klitschko unau thuthmun nghet Germany ramah ngei mai Briton palian Fury ngei mai chuan hun rei tak reigning champion ni tawh Wladimir Klitschko chu a rawn tukdawl ta mai a, Ukrainian a hneh rual khan Briton kutah WBA (Super), IBF, WBO leh The Ring heavyweight title a lut zui ta a ni.
Fury hian a career-a a hneh loh awmchhun Ukrainian professional boxer Usyk laka phuba lak a duh thu a lo sawichhuak tawh a; hetih lai hian Usyk chuan WBA (Super), WBC leh IBF belt a hren mek humhim tura a hmachhawn duh chu Wilder a nih thu a sawi thung.