Saza kaptu an man

Saza kaptu an man
Aizawl Forest Division hnuaia Seling leh Saitual Range tangdun chuan an report dawn bawhzuiin tunkar Nilaini khan Saza sa leh a peltu an man.
Sa peltua puh hi Sesawng khaw mi niin, Forest department hian an report dawn bawhzuiin a in leh a chhehvel an dap a, Saza sa leh pawihkhawihna atana a hman hmanrua an man a. Ningani khan thubuai siamsak niin, Central Jail-a dahluh nghal a ni.
Sa peltu nia puh man tak hian phalna tel loa Saza a lo pelh avang leh a sa phalna tel loa a lo kawl avang hian The Wildlife (Protection) Act Section 9, Section 39(1)(b) leh Section 39(3) a bawhchhia a; Saza hi The Wildlife (Protection) Act 1972 hnuaia Schedule 1 ramsa zing ami a nih avangin Section 51(1) behchhanin hremna na tak – lung in kum 3 aia tlem lo, kum 7 thleng tan theihna leh sumfai Rs. 25000 thleng chawi theihna a ni tih an sawi.
‘Mizoram State Animal – Saza hi humhalh tura tan lak a nih mek laia hetiang pawikhawihna a thleng thin hi a pawi a, Zoram mipui nungcha leh ramngaw humhalh kawnga hma sawn zel turin kan ngen a ni,’ Forest department thuchhuak chuan a ti.