Airport runway thawmthat March 31-a zawh hman tum
Airport runway thawmthat
March 31-a zawh hman tum
Public Works Department minister Vanlalhlana chuan Nilaini tlai khan Lengpui Airport runway siamthat hna thawh mek chu a hmunah a endik a, PWD hotuten an tawiawm.
PWD minister chuan hnathawh lai mek chu lungawithlak hlea a hriat thu sawiin, a tha thei ang ber leh a hma thei ang bera thawk zo turin thawktute a chah. Ruahman anga thil a kal tluan theih chuan 2026 March 31 hian runway re-carpeting hi thawh zawh hman an inbeisei tih thawktute chuan an lo hrilh.
Lengpui Airport hi kum 1998-a Mizoram PWD siam a ni a; a upat ve tawh bakah a chak zawng pawh 38 PCN (Pavement Classification Number) chauh a ni. Resurfacing ti tawh thin mah se, aviation lama thuneitu Directorate General of Civil Aviation chuan duhthu a sam lo tih an lo sawi tawh thin. Sawrkar chuan engtiang taka thawmthat ngai nge a nih hriaa zirchiang turin CRRI (Central Roads Research Institute) ruaiin, thlawhna lian chi pawh tum theihna, 50 PCN tal ni turin re-surfacing hi tih a ni.
Re-surfacing atan hian Mizoram sawrkar chuan SASCI atangin cheng vaibelchhe 91 a ruahman a, a thawktu atan airport lama tawnhriat nei tha Brahma Infra, Rajasthan rawih niin, 2025 April atang khan hmanraw mamawh chhekkhawmin hma an la tan a, fur a nih avangin duh anga chakin hna an thawk lawk thei loa; 2025 November 1 khan trial run neiin, November 10 atang khan re-surfacing hi an ti tan a ni.
Runway thawmthatna atana hmalakna:
8 Runway bitumen layer awm sa, CRRI-in 130 mm tal laih chhuah vek tur a tih chu, tha lehzual turin tunah hian Germany siam milling machine hmangin 150mm laih chhuah a ni. Layer hmasa berah dense bituminous macadam (DBM) 65mm a chhah bituminous course phah a ni anga, DBM layer khatna phah zawh a hnuah a chungah glass grid leh SAMI layer phah a ni ang. Chumi chungah chuan DBM layer hnihna 65mm a chhah phah leh tur niin, a chung berah BC 40mm a chhah phah a ni dawn a, a layer pumpui chhah zawng hi 170mm a ni ang.
8 Zin veivakte tikhaihlak lo thei ang ber tura hna hi thawh niin, thlawhna pawh nitin tum tir reng tho a ni a; nitinin thlawhna thlawk chhuak hnuhnung ber a chhuah hnu, tlai dar 4.45 vel atanga tanin, zing dar 9.00 vel thleng thawh thin a ni. Chhun lama thlawhna a tum leh theihnan zingkarah PWD-in quality test neiin, chu chu Air Traffic Controller lamin a pawmpui leh phawt a ngai thin a ni.