India-ah Gor-a hovin US palai team thar inbun hnai

India-ah Gor-a hovin US palai team thar inbun hnai
Tun hnaia India nena an inkar a that vak loh hnua siam thar leh tuma hmalakna kal mek zelah US palai team thar, ambassador atana ruat, Sergio Gor-a hote chuan karlehah US embassy an luah leh tan dawn nia sawi a ni.
November thlaa rinawmna thu tiamtira lak luh, Gor-a hian Inrinni hian India a lo thlen beisei a ni a. Tun hnai lawk thlenga Kathmandu, Nepal-a an ram embassy-a deputy chief thin, career diplomat, Jason P Meeks-a’n a zui dawn nia sawi a ni.
August thlaa India-a an ram palaia a rawt lai khan Trump-a hian Gor-a hi ‘thian ropui tak’ tiin a lo sawi tawh a. Kum 39 mi, sumdawng leh politic-a inhmang tak hi personnel appointment-a an hotu ber thin leh South & Central Asia special envoy ni thin a ni a. Tunah hian kum 20 chuang chhunga ram pahnih inkarin a chhiat ber lai thleng mek siam thaa tithar leh turin ruat a ni ta a ni.
Tar lan tawh thin angin Trump-a sorkar hian India hi Russian thil a lei avangin hrem nan an bungrua a lakluhah chhiah 25%-in a tipung a, a hnuah 25% dangin a tipung leh a, hei hian ram hnih inkar a tihkhik phah hle.
Ram pahnih hi hun rei tak ata tawh sumdawnnaa inremna siam tuma indawr lai an ni a, nikum favang laia inremna siam mai tawh tura beisei an nih laiin Trump-a sorkarin lo neih leh ni tin mamawh thila duh dan a neihah an inrem thei ta rih lo.
Gor-a hian October thla khan New Delhi tlawhin Prime Minister Narendra Modi, National Security Adviser Ajit Doval leh External Affairs Minister S Jaishankar nen pawh an inkawp a. Hei hi Trump-a sorkar pawhin India-a palai atan an duh chhan nia sawi a awm.
Meeks-a thung hi Asia leh Africa-a an ram tana palai hna kum 20 chuang lo thawk tawh niin New Delhi-ah hian US deputy chief of mission chhuak ta, Jorgan Andrews a thlak ang.
Mi thenkhat chuan Gor-a hian New Delhi-a an embassy-ah hian ama pual team, a duhthlan a ho dawn niin an sawi a, hei hi Trump-a sorkarin a ngaih pawimawh bikte khawihtu tur an ni ang.
Gor-a hna lian ber tur chu an ram leh India inkungkaihna chhe mek siam that leh bakah Trump-a’n a tlawh theihna tura ruahmanna siam a ni a. November-a lak luh a nih lai pawh khan Trump-a hian Delhi nena an inkar titha leh tura a rintawk thu te, US industry leh technology-a India a luh thuk lehzualna tur te leh US-in energy a thawn chhuah tipunga himna kawnga thawhhona huang zauhna tura hma la tura a rin ngam thu a sawi a ni.
Trump-a hi April thlaa China thlawh tura ruahmanna a awm mek laiin India tlawh tur thawm engmah a la awm lo va. Beijing a zin tur hi nikuma India-in a thlen, Quad Summit kaihhnawih nia sawi a ni a, India-US inkara sumdawnnaa inremna kaihhnawih a tel bawk nia sawi an awm bawk.