Reliance-in Venezuelan tuialhthei lei ve tum
Khawvela tuialhthei thlitfimna hmun lian ber neitu, India-a Reliance Industries Ltd chuan US ni lo ram dang atanga Venezuelan tuialhthei lei phalsak a nih chuan an lei dawn niin an sawi.
Reliance Industries thupuangtu chuan Reuters-in email-a an zawhna chhangin, “Venezuelan tuialhthei hi US ni loten lei theih a ni ve dawn em tih kan ngaichang mek a, tih dan phung pangngaia leisak chu kan tum a ni,” a ti.
Sorkar hnuaia thlifimtu, Indian Oil Corp (IOC), leh Hindustan Petroleum Corp (HPCL) te pawhin US ni lo atanga lei phalna a awm phawt chuan Venezuelan tuialhthei lei ve hi an tum niin industry chuan a sawi bawk.
Company pahnih erawh hi chuan hemi chungchangah hian Reuters zawhna an la chhang ve lo thung.
Inrinnia US sipaiten President Nicolas Maduro-a an man hnuah Caracas leh Washington chuan tun kar khan Venezuelan tuialhthei thlitfim loh dollar tluklehdingawn hnih man, barrel maktaduai 30-50 vel US-in a leina tur an pawm.
Reliance hian Venezuelan tuialhthei hi March, 2025 atang khan President Donald Trump-a’n India bungrua an lak luha chhiah 25% a tihsan atang khan South American ram atang hian thlitfim loh lak luh an titawp a. An leisak hnuhnung ber chu nikum May kha a ni.
Reliance hian India khawthlang, Gujarat-ah thlitfimna hmun zau tak pahnih a neihah ni tin barrel maktaduai 1.4 chuang an thlifim thei a, Venezuela-a Merey atangin man tlawm zawk leh tam tham zawk lak luh phalsak an lo ni tawh thin.
“Venezuelan tuialhthei hi khawvel hmun dang atanga lei theih leh a nih dawn chuan a man a tlawm thei dawn a, dah that pawh a tam thei ang a, eibar dapna kawng thlengin a nghawng thei dawn a ni,” tiin Kpler-a zir chianna kalpuitu, Sumit Ritola-a chuan a sawi.
India atang hian HPCL-Mittal Energy, Nayara Energy, IOC leh Mangalore Refinery & Petrochemicals (MRP) te pawhin tun hmain Venezuelan tuialhthei hi an lo lei tawh thin.
India hian tun hnaiah Russian tuialhthei a leisak tam a, khawthlang ramte chuan Moscow-in Ukraine a rûnnaa sum a siamsakna nia puhin leisak tawh lo turin a kar reng a, US chuan nikum khan a leisak avang hian hrem nan chhiah 50%-ah a tihsansak nghe nghe.