Party palite’n office hawng tan

Party palite’n office hawng tan
Political party pali, ZPM, MNF, Congress leh BJP te’n Thawhtanni khan kum thar atan party office an hawng tan.
ZPM party office hawnnaah Lalduhoma, chief minister-in thu a sawi a, inremna nena kum bul tan turin Mizo mipuite a sawm. “Kan party-a awm zawng zawngte, kan zavai hian ngaihdam ngai apiang inngaidamin he kum thar hi inremnain bul i tan ang u,” a ti bawk.
ZPM party office hawnna hun hi K Sapdanga, home minister-in a kaihruai a, Rev Vanlalzuata’n hunserh a hmang a ni.
MNF party office Hnam Run pawh Thawhtanni-ah an hawng tan a, an party president Zoramthanga’n thu sawiin, Pathiana innghat tlat turin party mipuite a sawm. “Manganna hrang hrang kara kum 64 MNF min hruai tawhtu Pathian hian MNF hi kawng laklawhah min kalsan lo ang. Pathian vuan tlat ila, Amah i innghat tlat ang,” a ti.
Party office hawnna hun hi an party vice president Vanlalzawma’n a kaihruai a, Rev Dr Vanlalbela’n hunserh a hmang a ni.
Congress party pawhin an office Congress Bhavan an hawng a, an president Lal Thanzara’n thu sawiin, “Kan party-in Kum thar atana kan mamawh chu inlungrualna, inthurualna, inngaihtlawmna, indawh tawnna a ni,” a ti.
Party office hawnna hun hi RL Vala, vice president-in a kaihruai a, Rev Zochhuanmawia’n thuchah a sawi. Congress party hian AMC inthlan lo awm tura an candidate tur thenkhat an puang nghal.
BJP pawhin an office Mipui Run an hawng a, he huna thusawitu Dr K Beichhua, an party president chuan an kawng tur chhut ngun tura party mipuite sawmin, “2026-a BJP te kan kal dan turah pawh fimkhur taka kan kal a pawimawh hle a, Pathian lam enin Pathian ring chungin kan kal zel ang a, a kaihhruaina hnuaiah lungrual takin kan kal zel dawn a ni,” a ti.
Mipui Run hawnna hun hi an party vice president Vanupa Zathang-in a kaihruai a ni.