Congress office hawng, theih tawp chhuah turin sawm

Congress office hawng, theih tawp chhuah turin sawm
January ni 12 khan Congress party-in an office Congress Bhavan an hawng a, an party president Lal Thanzara’n mipuiin Congress an beiseina tihlawhtling tura theihtawp chhuah turin party mite a sawm.
“ZPM sorkar kan hrawn mek a, mipui beisei an pha lo hle a ni. Term kal ta lamah MNF an sorkar a, mipui beisei an pha chuang lo a, tun dinhmunah mipui beiseina awmna chu Congress party hi an ni. Chumi tihlawhtling tur chuan party miten theih tawp kan chhuah a ngai a ni. Thingtlang lam a kan mipuite manganna ata khai chhuak turin kan tanrual a pawimawh a ni,” a ti.
“Kum 2025 chhung khan inthlanna hrang hrangah, a hma kum ai chuan hma kan sawn hle ani tih kan hre tlang theuh awm e. Theih tawp chhuah a kan beihzel chuan hmalam kan pan zel ang,” a ti bawk.
“Congress party hi a sorkar leh a nih chuan NLUP tha zawk leh changtlung zawk kan kalpui leh dawn a. Zokhua/thingtlang lama kan mipuite dawmkan nan leh khai chhuah nan NLUP hmangin nasa takin hma kan la leh dawn a, thalai tam tak pawhin eizawnna ngelnghet zawk an neih theih nan hma kan la zel dawn a ni,” tiin an party thil tum a sawi.
“Tun Krismas kan hman ral takah khan Kum danga kan la hmuh ngai loh, Kristiante Krismas hmanna tihbuai leh dawta inhekna te India ram hmun hrang hrangah VHP, RSS leh Bajrang Dal te’n an siam a. Hei hi Krismas hun danga thleng ngai lo a ni. Heng BJP talh fiak VHP, RSS, Bajrang Dal member te pawh hi Mizoram a rawn kal a, kan Kristianna nun mawi leh hawihawm tak, kan inzah tawn thinnate hi rawn hmu ve turin ka sawm a ni. Hetiang nun mawi hi kan Kristian puite chungah pawh lo pu ve turin ka phut nghal bawk a ni,” tiin tun hnaia Kristiante tuarna chungchang a sawi.