Kar khat chhung Kut dawn Chawimawina Nopui siam

Kar khat chhung Kut dawn
Chawimawina Nopui siam
Chief minister Lalduhoma kaihhruaiin Chapchar Kut 2026 Organising Committee chu Thawhlehni khan an thu a. 2026 Chapchar Kut programme kimchang an duangfel. Kar khat chhung lawm tum a ni.
March 9-ah Kut puala tlan (Kut Run) neia a lawmna bul tan a ni anga, he tlan (run) pual hian kum dang ang bawkin Central YMA -in anmahni sensoin t- shirt a lo buaipui ang.
March 10-ah handloom, textile & handicraft, food processing & food court hawn a ni anga, a hmun tur ruahman fel a la ni lo. Hemi ni vek hian Aijal Club Lawn-ah Flower Show tan a ni ang.
March 11-ah painting, photo exhibition leh Chapchar Kut film show Vanapa Hall leh Lianchhiri Run-ah tan a ni anga, March 11 & 12 hian Falkawn Zokhuaah ‘Living Museum’ neih a ni ang.
March 13 chawhma dar 10.30 atangin Lammualah a Kutpui ber hman a ni anga, darkar 6 a awh ang. Chief minister ‘Kut Pa’ a ni ang a, Art & Culture minister C Lalsawivunga chu ‘Kut Thlengtu’ a ni ang.
Bawlhhlawh hnutchhiah lo Kut (Garbage Free Kut) kalpui tum a ni.
Kumin Kut thupui atan “Zo nun zemawi – Inremna” tih Committee hmasa lama thlan tawh a ni.
Kumin atang hian chief minister ‘Chawimawina Nopui’ sem a ni tawh dawn a. Nopui dawng tlaka ngaih rawtna hrang hrang lut zing atangin a tum khatnaa dawngtu turte chu tun tuma thutkhawmah hian an thlang a. Chief Minister Nopui hian sumfai nuai khat, citation leh memento a keng ang.