NE hmalam hun sawihonaah minister

NE hmalam hun sawihonaah minister
Bengaluru-a Christ University buatsaih “Libernum 2026 – International Conference on Northeast India at the Crossroad: Inclusion, culture and a sustainable future” neih mekah Thawhlehni khan minister Lalrinpuii chu khuallian a ni a. India ram chhung leh khawvel hmun hrang hrang atanga university professor leh mithiam rual an tel.
Minister chuan thalaite hnenah hmarchhak chu ‘landlocked’ tia sawi tawh loa, ‘land-linked’ tia sawi tawh turin a chah a. Agartala- Akhaura rel kawng, Kaladan Multi-Modal Transit leh Asian Highway avangin kawng engkimah kalpawhna a tha tawh hle tih a sawi.
Digital democracy leh inrelbawlna technology chungchang sawiin, 4G leh 5G than chhoh zelna zarah Mizoram kilkhawr bera cheng zirlaite leh Bengaluru-a awmten thiamna leh hriatna inang an dawng thei tawh a. Hei hi ‘inclusive governance’ dik tak a ni, tiin a sawi a ni.
“Hmasawnna leh hriselna chu damdawi in tam lam ringawt ni loin, mahni rama awm a, eizawnna ngelnghet neih theihna hi a ni. Aizawl atanga London thlenga thil thawn chhuak thei thalai entrepreneur-te hi hmasawnna dik tak chu an ni,” Lalrinpuii hian a ti a.
Hmarchhak chu India ram boruak thianghlim petu a nih avangin, hmasawnna kalpui dan pawh a danglam a ngai a. Eco-tourism, carbon credits leh energy thianghlim hmanga hmalakna chu hmarchhak innghahna tur a ni tih a sawi.
He conference-ah hian Mizoram atanga artificial intelligence lama hma latu LushAITech pawh Christ University nen thawk dunin ‘AI partner’ angin an tel a ni.