Kawng laih leivung paih dan a fel loh chuan chawlhtir tur

Kawng laih leivung paih dan
a fel loh chuan chawlhtir tur
NHIDCL hnuaia kawngpui laiha leivung paih dan a fel loh chuan hna chawlhtir rih mai tur tih chief minister Lalduhoma chuan a sawi.
Chief minister ho hian Mizoram Pro-Active Governance & Timely Implementation (Mi-PRAGATI) thutkhawm hmasa ber chu Nilaini khan Aizawlah neih a ni a. Mi-PRAGATI member secretary, chief secretary Khilli Ram Meena chuan PRAGATI chu state chhunga hmasawnna hnathawh lian vil a, harsatna an tawh chinfel dan dappuitu tur leh a tul anga department ho thawhhona tichak tura din a ni tih a sawi.
Thutkhawma sawrkar hmalak mek thlan chhuah bik project an sawiho zingah, Aizawl Western Side Bypass Road thawh dan sawi a ni a, harsatna awm leh a chinfel dan tur an sawi.
Chief minister chuan, Aizawl Western Side Bypass road laih meka leivung paih dan fel lo chu chak taka bawhzui turin a mawhphurtute a hrilh.
“Contractor-in dan dik takin leivung a paih tur a ni a, dumping ground pawh dan ang thlapin a siam tur a ni. Dan anga leivung paih a nih dawn loh chuan hna chawlhtir rih mai tur. Mizoram hmun danga NHIDCL kawng laihah pawh chutiangin leivung paihna a felfaiin dan ang thlapa kalpui tur a ni,” a ti.
Vairengte -Sairang four lane national highway laih mek pawh sawiho niin, harsatna awm sawi a ni a. A bawhzui dan tur rel a ni.
Vairengte -Sairang inkar kawngpui awmsa, thawmthat mek pawh NHIDCL-in report an pe a. Chak taka hma lak a ni tih an sawi.
Mi-PRAGATI hi 2025 August-a din a ni a. Member-te chu – principal secretary, secretary, deputy commissioners leh state chhunga sawrkar laipui department /agency head an ni.