Sawhthing & hmunphiah leiah state pawn ami pawm dawn lo

Sawhthing & hmunphiah leiah
state pawn ami pawm dawn lo
Nikuma sawrkarin sawhthing leh hmunphiah a leiah Mizoram chhung ami ni lo hralh tel tum an awm a, hetiang hi a thlen tawh lohnan ruahmanna tha zawk an siam a, tilui an awm a, manchhuah an nih chuan an chungah action lak a ni dawn tih sawi a ni.
Mizoram Agriculture Marketing Board (MAMB) chuan an co-chairman Dr KC Lalmalsawmzauva hoin thuthar thehdarhtute hnenah thlai thlan bik panga lei tura kumin atana sawrkar a inbuatsaih dan leh ruahmanna siam dan an sawi a. Sawhthing hi February 2 -May 30, aieng February – April, hmarcha February – April leh hmunphiah February -March chhungin lei a ni dawn. Buhhum hi nikum November atanga lei tan tawhin kumin March thleng lei a ni ang.
Sawhthing bikah minimum support price chu Rs.50 a ni leh anga, Secondary Collection Centre (SCC) 64 siam niin, nikuma SCC atanga dahkhawl lehna – buffer stock siam chu kuminah chuan siam a ni dawn loa, sawhthing leikhawmsa leichhawng turten SCC atangin an lei ang.
Sawhthing chingtute chu Society member-a inziaklut vek turin an chah a. An bank account-ah support price hi a luh dawn avangin tuna sawrkarin thawhpui bank hoah account nei turin an chah a ni.
Nikumah sawhthingah hian Myanmar sawhthing lei tel a ni a, a hnu ah an hrechhuak a, tun thlengin helai SCC-a hralhtute ah sum inpek fel hleihtheih loh leh, police nena la umzui an awm tih MAMB co-chairman hian a sawi. Hei hi tih reh a nih theihnan a hralhtute sawhthing bag bikah ‘tag’ dah a ni anga, ration card number, hming, khua leh phone number dah a ni dawn tih a sawi a ni.
Sawhthing a tlawm zawka leikhawm a, ‘support price’ beisei an awm thin tih pawh sawiin, sawrkarin leitu tur a hmuh hma chu a cho lam hmanhmawh lo turin a chingtute an chah tih a sawi a ni.
“SCC tinah sawrkar hnathawk supervisor leh assistant supervisor dah an ni anga, an ni hian Mizorama thar chauh lak a nih leh nih loh an enfiah ang. An signature a awm ngei ngei a ngai dawn,” a ti a. Sawhthing chu a hralhtute khua ni lo, an dahkhawmna atanga an lei dawn a a buk ritna zat chu hman a ni dawn tih a sawi.
MAMB member secretary, Agriculture principal secretary Ramdinliani chuan Mizoram sawhthing chu chemical tel lo, a tel pawhin mihring tana hlauhawm pha lo a ni tih state pawn lama a leitu turten an hriat avangin lei duhtu an tam a, organic certificate nei lo mah se, an duh hle tih a sawi. Chutih rualin hralh tura ruahman danah erawh lei itawm tura siam thiam a ngai a, chuti lamah chuan tan a ngai tih a sawi a ni. Hetianga siam thiam loh chuan a leitu turte a hnar thei ve tho tih a sawi.
MAMB co-chairman chuan, sawhthing an hralh lehna man tur hi an tifel thei loa, a chhan chu, sawrkarin floor price a siam Rs.50 aia sanga hralh theih an inbeisei vangin, lei duh turte nen an la indawr mek zel tih a sawi a ni.