KTP inkhawmpuina tur enpui
KTP inkhawmpuina tur enpui
KTP General Conference 2026 Saituala hman tur pualin Organising Committee leh khawtlang hruaitute chu Ningani khan Tawi bialtu MLA, minister Prof. Lalnilawma chuan a kawm a, an mamawh bungrua a pe nghal.
Minister chuan Organising Committee hnenah silpauline bundle 10 a pe a, hei bakah hian hmalakna tur hrang hrang sawiin, MGNREGA, MC atanga field luhka, zun in, electric ban, chhim lam step railing siam, a bula lungphun hmun danga sawn bakah gallery rawng hnawih thar tur a ni tih a sawi.
Khawpui chhung cheina tur UD&PA atangin cheng vaibelchhe 1.5 tihfel hnaih a ni a, khawchhung kawng 3rd Road zawmna, NEC Road siamthatna tur sum pawh a chhuak hnai tawh tih a sawi a. MLA fund atangin buhfai man tlawm zawka lei theih a ni dawn tih a sawi bawk.
Thutkhawm zawhah Organising Committee leh minister hian pandal an enho a, hma lak ngaite bawhzui dan tur an sawiho. High School tlanga reservoir tanky litre nuai 4 dawng siam mek a tlawh a, SASCI hnuaia Saihmar Tlanga Circuit House sak mek leh Vanapa khawthlir a tlawh.
Vanapa Khawthlirah hian kum 2014 khan Saitual Joint YMA chuan chawlhbuk an siam a, a panna kawng hi kum 2024 khan MLA fund hmangin laih a ni.