FCAA 2023 LEH GREEN ECONOMY
Debbie Rinawmi
FCAA 2023 CHU
Forest (Conservation) Amendment Act, 2023 hian hun eng emaw chen atang khan Zoram dung leh vang a tuam chhuak a ni ber mai a. Lok Sabha-ah March 29, 2023-ah put luh a ni a; he dan hi Forest Conservation Act, 1980 siam danglamna a ni a, he dan huam chhung atanga ram belh leh awl ir te hian sawi an hlawh hle a ni. A history lam chu a thiam leh hria te sawiah khek ta ila, he danin a tum leh eng chen nge a huam tlangpui te, he dan siam thar hi kan chheh vela kan chenpui dangte ngaihtuah chungin han ngaihtuah ve dawn ila.
Ramhnuai humhalhna chungchangah he dan hian state sawrkar te chu non-forest use, heng- ngawa siam (afforestation) ni lo thildanga thlawhhma siam te, khawla siamna lam (industry) te chu a khap tlat a. He khapna in a huam loh lam ve thung chu- mei kawng siam te, ramri hung siamna te, wireless communication (electric conductor hmanga thu inhlan chhawnna) te chu ramhnuai humhalhna leh hmasawnna a nih avangin sawrkar laipuia dil a ngai lo va, sawrkar laipui pawhin hma a la thei bawk a ni. Heng bakah hian ram humhalh lai (protected areas) huam chhung lo vah Wild Life (Protection) Act, 1972 hnuaiah sa huan leh sa pelhna hmun te, eco-tourism kaihhnawih thil te, silvi culture kaihhnawih (thingkung leh ramhnuai hmasawnna leh hriselna thunun) te a tel bawk a ni. He dan chhunga phal loh te hi state sawrkarin sawrkar laipui remtihna tel lo chuan hma a la ngawt thei lo a ni.
Pahnihnaah chuan, he bill-in a huam tur chin ram (land) chi pahnih a tar lang a, chungte chu- Indian Forest Act, 1927 emaw dan dang emaw ramhnuaia puan ram te leh henga tel lo, mahse, October 25, 1980-a ramhnuaia puan te an ni.
Pathumnaah chuan ram (land) awltir tur chin hian sawi zui a hlawh hle a. He bill hian hemi dan (Act) in a huam loh chin turah chuan sawrkarin a enkawl vantlang kawng leh rel kawng 0.10 hectare chin te an ni. Heng bakah hian he dan hmanga humhalh tur zinga tel lo te chu- ram leh ram inrina (international border) Line of Control, Line of Actual Control, ram himna atana hman tura tih atanga km 100 bial chin te, ram himna ruhrel atana hman tur ram hectare 10 chin, inhumna (defence) lam kaihhnawihna lam thil siam nan, paramilitary force ho riahbuk, leh central sawrkar hnuaia vantlang tana thil tangkai tur thil siam nana ram (land) hman te. Hengte hi zalenna angin lang mah se, ram hralhna hmahruai nia ngaih theih a ni a, hei hian mi tam tak a tithlaphang a ni.
KAN TLANG MI UNAUTE DAWNSAWN DAN
Nagaland Legislative Assembly chuan he bill-a section 1(A) (2) in ramri chhehvel km 100 lai changkanna ruhrel (project) siam nana khuahkhirh a awltir hi an hre thiam lo hle a ni; hei hian an ram chin tam zawk a huam mai bakah Article 371(A) in tribal mite an ram neitu nihna a pek chu a kalh a nia sawi a ni. Tripura-ah pawh Tripura Rajya Upajati Ganamukti Parishad (GMP) leh tualto pawl hrang hrangte pawhin tribal mite dikna chanvo a rap bet nia an hriat avangin tha an ti lo a ni. Chutiang zelin Sikkim pawh Nagaland-in an hnawl chhan bawk kha sawi ve lehin an ram leilung fate tana pawi thei a nih thu an tlangaupui a ni. Hemi a nih rual hian Sikkim chuan hmasawnna ruhrel atana sawrkar laipui hmalakna chu a thlawp thung a. Kum 2025-ah phei chuan ‘Mero Rukh Mero Santati’ leh ‘Sikkim Paryavaran Parva 2025’ kaltlangin Sikkim sawrkar chuan an tualto leilung humhalhna chu a thlawp tha viau a ni. Mizoram pawhin kum 2023-ah kha chuan an thlawp lo ve viau a, mahse August 27, 2025-ah chuan hmasawnna ruhrel atan an pawm ta a ni.
GREEN ECONOMY CHU LE
‘Green economy’ tawngkam chherna hi kum 20 chuang fe liam taah khan a ni a, heng ang thil hi kum engemaw zat kal ta atanga mi thiam zawk ten kan chenna khawvel tana an buaipui tawh thil pawimawh leh ngaihtuah ngai a ni tih a hriat theih mai awm e.
Kum 2008-a khawvel sum leh pai dinhmun inthlakna hun derthawng khan Global Green New Deal (GGND) an tih chu a hring chhuak a. United Nations Environment Programme (UNEP) in kum 2009-a a chhawp chhuah GGND hian thil tum pathum a nei a, chungte chu-
· Sum leh pai chet velnaa hun harsa atanga din chhuah leh
· Retheihna tih kiam
· Kan boruak hip ti thianghlim lo thei chemical thenkhat, entir nan, carbon ang te a lo insiamna tih tlem.
Heng bakah hian kan chenna khawvel a lo hrisel a, a lo thianghlim zawk nan GGND chuan green stimulus programme an tih rawtna a nei a, chung zingah chuan ram rethei leh harsa zawkte chhawmdawl pawh a tel a ni. Heti khawp hian United Nations hialin ngaih pawimawhah nei mah sela, hmalakna leh a sawtna duh anga chakin a kal hleithei lo va; chuvangin keini ramah pawh keini’n kan ziah a tul ve ta hial a ni. Green economy thil tum hi Sustainable Development Goals (SDG) nena inhne remin a inhnaih hle a; hei vang hi ni maw an pahnih hian sawi kawp an ni fo thin a ni.
A bik takin Asia khawmualpuiah green economy tluk zet mi thiam ten an chawi lar chu green growth leh circular economy an tih hi a ni a. United Nations Economic and Social Commission for Asia and Pacific (UN-ESCAP leh midangte 2010) te chuan green growth hetiangin an hrilhfiah a- “kan chenna khawvel siam tha zawng, boruak chhia siam tam lo leh hmasawnna a huam zau thei ang zawnga ei leh bara hmasawnna hi a ni”, tiin (UNESCAP Environment and Development Division, Green Growth).
Green growth hrilhfiahnaah pawh hian SDG a lo lang leh a, khawpui tam taka thil siam chhuahna hmun (factory/industry) a boruak ti bawlhhlawhtu chemical hman tlem pawh an thupui leh an thil tum zingah a tel tlat tih a hriat theih a ni.
Tun tumah chuan sawi kim lo hle mah ila, hetiang hi kan chhehvel boruak a ni a, khawvelin a buaipui mup mup chu green economy hi a ni. Kan Zoram pawh hian kan chhehvel (environment) buaipui hi hnapuia kan neih loh chuan kan tlai ang tih a hlauhawm hle a ni. Politician te, Pathian thu sawi te, sawrkar hnathawk te, mahni kea ding te, leh mi naran nia inhria te thlenga kan buaipui a ngai a. Green economy tarmit atanga thlir chuan tih tur, la tih loh hlir ni hian a hriat a. Khawvel zau zawk thlir chunga he lama kan mit kan len a, kan sukthlek a tul takzet a ni.