Australian Open women’s singles: Tie-break record siam chunga quarter-final lut Sabalenka

On Jan 26, 2026 0 0

Australian Open women’s singles:
Tie-break record siam chunga quarter-final lut Sabalenka
World number one Aryna Sabalenka chuan Open era Grand Slam bika tie-break hmanga chak zawn rei Novak Djokovic-a record khumin Canadian young gun an tih mai mihang tleirawl kum 19 mi Victoria Mboko lakah 6-1 7-6(1) hnehna nen a zawna a kum lina atan Australian Open quarter-final a lut a, tie-break hmangin match 20 a chak tling ta chiah a ni.
Rod Laver Arena-a fourth round hnehna a sualchhuah leh nen Belarusian hian kumin Australian Open kal laiah set a la hloh lo.
Melbourne Park-a vawi hnih champion tawh Sabalenka hian Canadian mihang tleirawl lasi thawnthu kal lai a tihtawpsak hnuah tennis rising star dang Iva Jovic lakah fiahna dang a hmachhawn leh ang.
17th seed Mboko laka pressure na tak a paltlang chungchang X kaltlanga sawi chhuakin, tun ang laia tie-break khelh ngai chho ta zut chu a duhzawng tak a nih thu a sawi a, fiamthu thawh zui nghal zeuhin, tie-break hmanga chak zing ber 24-time major winner Djokovic a kap a, Serb laka upset a hlenchhuah thu a post.
Top seed Sabalenka hian Grand Slam a khelh hnuhnung vawi 13-ah quarter-final chin tal a thleng fai vek a, Melbourne bika a zawna tum li final lut tling turin vawi hnih chiah chak a mamawh leh tawh.
Kum 2023 leh 2024 Australian Open champion Sabalenka hi nikum final-ah American Madison Keys hneh loin a tlawm ringawt a, kumin chu kum 27 mi hian a lallukhum hloh tawh chanlet leh a tum ruh khawpin a rinawm.
Chutih kawnga a tum leh tur American tleirawl kum 17 mi Jovic hian nikum September thla khan a career-a a WTA title hmasaber chu Guadalajara Open-ah hlawhchhuakin, nimin fourth ound inkhel dangh Kazakhstan nula Yulia Putintseva laka 6-0 6-1 hnehna nuamsa a chan hnuah a vawi khatna atan Grand Slam quarter-final a lut a, chu hmuna player tha ber laka a theihna a fiah thei tur chu a phur takzet tih a sawi.
Sabalenka a khelh leh tur chungchang zawhna chhangin Jovic chuan, keima net lam hi ka ngaihtuah berin ka ring,” tiin a hmachhawn tur Belarusian laka lo invent chu a game kalphung tur a nih thu a sawi.
Sawizawmin, “Chhan tha tak nen number one a ni mek a, he tournament-ah hian a hlawhtling hle tawh bawk a, chu tak chu ka duh dan a ni,” a ti ve ngat.
29th seed luah chunga Melbourne Park-a beisei aia thui daih thleng tawh Jovic hian tunhma lamin major second round a la pel zo lo.
Straight-set ngata seventh seed Jasmine Paolini a hneh kha world top 10 chin laka a chak vawi khatna niin, fourth-round match-ah lah minute 53 lek chhungin Putintseva a paltlang leh mai a, Sabalenka tan pawh a chimawm ve fe thei tlat!
Gauff chak chhan inrintawkna
Quarter-final lut dang kum 21 mi Coco Gauff chuan Czech Republic player Karolina Muchova laka set hnihna hloh chungin 6-1 3-6 6-3 hnehna nen Grand Slam tournament-a set thum a khelh tlin tawha a record a siamtha a, heti zat set a khelhah vawi 26 chakin, tum ruk a tlawm thung.
2023 US Open telin tournament palia Muchova a hmachhawn tawhah Gauff hi a la chak fai vek a, Czech lakah na na na hi chuan a chungnung larh rih a ni.
`Two-time major champion Gauff hian final a la thlen ngai lohna Melbourne khaw tournament liana last eight a luh chhan sawiin, inrintawkna a neih tlat rah chhuah a nih thu amah tintu camera lens-ah ziakin, ‘confidence is the key’ tih a hnutchhiah.
World number three Gauff hian a major title pathumna a beisei leh mekna kawngah nimin women’s singles round of 16 inkhel pakhata 6-2 6-4-a Russian eighth seed Mirra Andreeva hnehtu Ukrainian seeded 12th Elina Svitolina a tum leh ang.