Juventus in Napoli an sawp

Pathianni zana Itlian Serie A match ngaihven hlawh takah Juventus chuan an mikhual Napoli chu 3-0 ngawtin an lo sawp. Champion lai Napoli an sawp vangin Juventus hian champion theih beiseina thar an nei. Inkhel dangah team lian AC Milan in hnehna an chang zo lova, Inter Milan an san zual theih phah thung.
Juventus hian Allianz Stadium-a an mikhual Napoli hneh ngei tumin tan an khawh. An mualah bul an tan tha a, Jonathan David chuan minute 22-naah hmahruaina goal a thun. Hmahruaina goal an thun hnuin khel tha zui bawk mah se goal an thun belh thei lo lo reng thung.
Inkhel hmuhnawm takah goal lut a awm belh theih loh reng hnuin hun tawp dawn hnaihah mualneitu Juventus an chefuh a, goal hnih an thun. Juventus tan hian Kenan Yildiz chuan minute 77-naah an goal hnihna thunin an hmahruaia a tizau a. An goal hnihna an thun hnu hian Filip Kostic chuan minute 86-naah an goal thumna a thun zui leh a, an chakna a nem nghet. Kostic goal thun hnuin goal dang a luh belh thei tawh lova, Juventus chuan champion lai Napoli chu 3-0 ngawtin an sawp.
Napoli sawptu Juventus hian khelh 22 atangin point 42 an hmu. Panganaah la awm chhunzawm mah se an chung chiaha awm Napoli nen point khat chiahin an inthlau a, pahnihna AC Milan nen point nga chiahin an inthlau bawk. Hmahruaitu Inter Milan nen an inkarah point 10 a tlazep mek a. Khelh tur a la tam vangin Juventus hi champion thei dinhmunah an la ding.
Awlsam taka Juventus an chak laiin pahnihnaa awm mek AC Milan chu an khingpui AS Roma nen 1-1 in an inhnehtawk ve thung. Roma mualah an chak zawh loh vangin AC Milan leh Inter Milan te inkar a zau belh a, an inkarah point 5 a tla zep thar.