Alcaraz a chak tluang zel

Thawhlehni khan Australian Open 2026 khelh chhunzawm a ni a, champion tura rinkai ber Carlos Alcaraz chu set hloh lovin a chak tluang zel. Alcaraz hian semi-final ah Alexander Zverev a hmachhawn zui leh dawn a, final lut turin fiahna hautak a paltlang a ngai dawn.
World No. 1 leh champion tura rinkai ber Carlos Alcaraz hian quarter-final-ah tualchhung tlangval Alex de Minaur a hmachhawn. De Minaur lakah bul tan tha uchuak lo mah se a chungchuanzia alantir nawn leh thei tho a, set hloh lova hnehna changin semi-final a lut.
Alcaraz hian entu mipuite tan hlawh tak De Minaur lakah bul a tan tha viau a, break a nei nghal pang. 3-0 ngawtin hma hruai hman mah se a serve a um zo lova, Minaur hian umpha in, 3-3 a ni hman. 3-3 a nih hnuin kal fal leh hret mah se set lak theihna hun remchang a neih a chhawr tangkai zo lova, a serve a hloh zui leh. A khingpuiin break bawk mah se Alcaraz hian a break let ve leh a, harsa takin set khatna a la.
Harsa taka set khatna a lak hnuin a khingpui a thunun zui a, set hnihna leh set thumnaah De Minaur hian a chai hleithei meuh tawh lova, Alcaraz hian awlsam taka set la zawn lehin tualchhung tlangval Alex de Minaur lakah hian 7-5, 6-3, 6-1 a hnehna changin semi-final a inhlangkai a, ropui leh zualna ram a hnaih deuh deuh zel.
Grand Slam-ah vawi ruk champion tawh Alcaraz hi Open Era-ah kum 23 tlin hmaa Grand Slam quarter-final lut ngun ber a ni a. Australian Open-ah hian a champion thei a nih chuan Career Grand Slam puitlin thei hmsa ber a ni dawn bawk. Career Grand Slam puitlin turin vawi hnih chak chiah a mamawh tawh a, a khelh that chhoh em vangin hneh a harsa hle ngei dawn a. Tun ang zela a khel tha a nih chuan hneh a harsa hle ngei dawn a ni. Khel tha tluang tak Alcaraz hian kum 2025-a finalist Alexander Zverev chu semi-final-ah a hmachhawn zui eh dawn.
Carlos Alcaraz hmachhawn a, fiahna hautak hmachhawn tur Zverev hian quarter-final-a a khingpui Learner Tien chu set khat hloh chungin a hneh hram. Zverev hian kum 20 mi Tien hi 6-3 6-7 (5-7) 6-1 7-6 (7-3) in a hneh a, semi-final a inhlangkai. Kum 34 mi Zverev hian ace vawi 24 zet a nei a, double fault vawi khat chiah neiin a service hmasa 76% zet a hlawhtling bawk. Alcaraz hneh thei tur chuan tiang bawka a chetthat nawn leh a, aces a ngah nawn leh a pawimawh hle ngei ang.
Carlos Alcaraz leh Alexander Zverev te hi vawi 12 inkhel tawhin vawi ruk ve ve an chak tawh a, an inhnehtawk hle. An inkhel hnuhnung pali-ah Alcaraz hi vawi thum a chak a. Zverev chakna hi hard court a ni thin a, semi-final paltlang thei dinhmunah a ding.