UCL-ah English club te an langsar

Nilai zanah khan Champions League – Lea-gue round khelh zawh a ni a, English team te an langsar hle. UCL-a English club paruk zingah tumah an tlawm lo. Team 5 in hnehna an chang a, English team paruk zingah tla an la awm miah lo nghe nghe a, team 5 in dirct in last 16 an lut hial nghe nghe a ni.
Reds an chak awlsam
Premier League lama result tha hlawhchhuah harsat thin Liverpool chuan Anfield-ah FK Qarabag an mikhual a, Azerbaijan club lain lakah awlsam takin an chak a, 6-0 ngawtin an lo sawp.
Liverpool hian an mualah bul an tan tha a, minute 15-na lekah Alexis Mac Allister chuan hmahruaina goal a thun nghal. Reds a zawm tirh lamah beisei anga a khelh that tawk loh vanga sawisel hlawh hman Florian Wirtz chuan minute 21-naah an goal hnihna a thun belh zui leh a, 2-0 a hmahruai chungin chawlhlawk an hmang.
Chawlhlawk hnu lamah Reds tan hian Mohamed Salah, Hugo Ekitike, Mac Allister leh Federico Chiesa ten goal an thun belh zui leh a, an mualah ngei awlsam takin point thum an hmu. Liverpool hian point 18 an hmu a, pa 3-na ni chungin Last 16 an lut. Qarabaq hian 22-naah an luah phak a, last 16 play-off an khel zui ve leh ang. Chelsea 3-2 Napoli
Manager thar Liam Rosenior hnuaiah harhtharna chang a, khel tha tluang tak Chelsea chuan fiahna hautak an paltlang a, mikhual an nihna hmunah Italian champion Napoli an hneh. Blues in last 16 an luh laiin Napoli chu play-off khelh phak lova tla langsar zingah an tel thung.
Chelsea hian mikhual an nihna hmunah bul an tan tha a, minute 19-naah Enzo Fernández penalty pet goal hmangin hma an hruai. Goal thun hmasa zawkah tang bawk mah se Napoli er let an tuar lova, chawlhlawk hmaa goal hnih chhuahin hnufual zawkah an tang hman. Napoli tan hian Antonio Vergara chuan minute 33-naah goal thunin an si phurh a sut a. United atanga an hawh mek Rasmus Højlund chua minute 43-naah hma an hruai letna goal a thun zui leh a, 2-1 a hmahruai chungin chawlhlawk an hmang.
Chawlhlawk hnu lamah inkhel a hmuhnawm zui viau a, Chelsea chan a ni deuh chawt tawh thung. Chelsea tan hian João Pedro chuan minute 61-naah goal thunin an si phurh a sut a. Pedro vek hian minute 82-naah hma an hruai letna goal a thun zui leh a, Blues hian Italian champion Napoli lakah hnehna changin point thum hlu tak an hmu zui ta a ni.
Chelsea hian Napoli lakah point thum hlu tak an hmuh hmangin khelh 8 atanga point 16 an hmu a, direct in last 16 an luh theih phah. Hnehna an chan vangin Chelsea in last 16 an luh vangin Napoli erawh chu an muala an tlawm vangin 30-naah an tlahniam dawrh a, play-off em pawh khel phak lovin an tla ve thung.
Spurs 2-0 Frankfurt
Nilai zan hian Chelsea rualin Tottenham pawh an chetha a, mikhual an nihna hmunah 2-0 in hnehna an chang a, palina ni chungin last 16 an lut ve bawk.
Tottenham hian Deutsche Bank Park-ah Eintracht Frankfurt an hmachhawn a, mikhual an nihna hmunah an khel tha hle. Spurs tan hian Juventus in lak an tum mek Randal Kolo Muani chuan minute 47-naah hmahruaina goal a thun a. Hma an hruai reng hnuin Dominic Solanke chuan minute 77-naah Europa League champion Tottenham goal hnihna a thun zui leh bawk a. Mimualah 2-0 a hnehna changin point thum hlu tak an hmu.
City 2-0 Galatasaray
Last 16 lut chiang nghal tura chak mamawh Manchester City chuan an mualah an mamawh point thum an hmu a, pariatna niin last 16 an lut chiah chiah. City hian Etihad stadium-a an mikhual Galatasaray chu chawlh lawk hmaa goal hnih thunin an hneh.
City tan hian Erling Haaland leh Rayan Cherki ten goal khat ve ve an thun a, darkar chanve hmaa an goal hnih thun an chakpui. Galatasaray hian play-off an khel zui ve leh ang.