Sawrkar kaltlanga sawhthing lei tum awm rih lo

Sawrkar kaltlanga sawhthing lei tum awm rih lo
Mizoram sawrkar chuan February 2 atang khan sawhthing chingtute sawhthing lei tan theih a ni tih a lo puang tawh a. Reserve price a san deuh avangin a ni khatnaah hian hriat theih chinah sawrkar kaltlanga leitu an awm rih lo.
Thudawn danin Mizoram sawrkarin sawhthing hralh chhuah phalna man a bituk, reserve price hi Rs. 40-45 inkar a ni a, Secondary Collection Center thenkhatah kg ah Rs.44-in tender call a ni a, minimum price hi chhangtu an awm loa, sawhthing lak ala ni lo. Hriat theih chinah district tina Secondary Collection Center zingah a ni khatnaah hian sawhthing leitu tur hmu an awm lo a ni.
Hetihrual hian sawrkarin uluk taka sawhthing chingtute a hriattir lawk avangin sawhthing cho lawk pawh an tam lo nia thu dawn a ni.
Mizoram Agriculture Marketing Board hotute chuan reserve price hi Mandi pahnih – West Bengal-a Siligur Mandi leh Azadpur Mandi Delhi-a sawhthing rate tinzawnin an siam tih thuthar thehdarhtute hnenah an lo sawi tawh a. February 2 bikah hian Siligur Mandi-ah kg. ah Rs. 58, Azadpur Mandi-ah kg. ah Rs. 55 velah a awm a, hei vang hian Mizorama reserve price hi a san phah nia sawi a ni.
Marketing Board hotute sawi lawk tawh dan chuan, reserve price hi chawlhkar khat zel kalpui tum a ni a, an zirchiang reng a, a tul angin ruahmanna an siam zel dawn tih an sawi a ni.
MAMB hotuten zawhna an chhan danin, Siligur Mandi hi Mizorama sawhthing thlen thlakna ber a ni a; Azadpur Mandi hi Asia rama sawhthing mandi lian ber a nih avangin heng Mandi pahniha sawhthing rate hi tinzawn deuh bik a ni tih an sawi.
Mimal sumdawng erawh sawrkar kaltlang kher loa Mizoram sawhthing lei tuma rawn hel an awm reng tawh a; thudawn danin tunah hian kg.ah Rs. 30 velin an laksak tlangpui a, a man erawh tlem tlemin a dang ve reng tih sawi a ni.