Budget tharah thlai thar leina tur kan dah dawn: – Agriculture minister

ZPM sawrkarin Bana Kaih Scheme hnuaia thlai thar leina tur a dah chu thenkhatin an hriatthiam loh avangin an dahna an zawt fo a, chief minister-in state budget-ah ngei dah a rawt angin 2026- 2027 budget-ah chuan thlai thar leina tur hi an dah dawn tih Agriculture & Farmer’s Welfare minister PC Vanlalruata chuan a sawi.Thawhtannia ZPM party office-a inkhawmah PC Vanlalruata chuan, nikumah ZPM sawrkarin thlai thar leina budget-ah a dah a, Handholding-ah an dah a, an ring nghal mai a. Mah se, House-ah thlai thar leina tur an dahna an zawh tak fo avangin chief minister-in, ‘Lo dah tawh rawh u, a hranpaa Handholding-a dah loin, an hre thiam lo em mai,’ a tih avangin 2026- 2027 budget-ah hian thlai thar leina tur an dah dawn tih a sawi a ni.
Nikum India ramah sawhthing rate ngaihtuah phak bakin a chhia a. Kg-ah Rs. 13, 14, 15 a ni chho a. A buyer an biakte pawh an lo kal lawk thei loa, February 20-ah a rate a up loh chuan sawrkarin lak a tiam a, sawhthing rate up loh karah sawrkarin kuthnathawktute hnenah kg-ah Rs. 50-in, mipui an tiam angin an la ta tih a sawi.
“Season tawp thlengin support price nen kg-ah Rs. 50-in farmer-te hnenah sum a lut a ni. Kan vannei a, nikumah tun ang hunah hian sawhthing kg-ah Rs. 10 -13 vel a ni. Tunah chuan sawrkar hun tiam thlen hma pawhin kg-ah Rs. 30 ten an hralh tawh,” minister hian a ti.
Mizoram sawhthing quality that bikna an hre tan mek a. Mizorama rawn kal tam ber hi South India ho pawhin an ni sawhthing chu pesticide a tam lutuk a, Mizoram sawhthing chu organic certificate nei lo mah ila, an lei duh zawk tih a sawi. “Mizoram sawhthing quality tha hi khawvelah kan zuar chhuak dawn,” a ti.
Nikumah hmunphiah a rate grading-in an ti a, mipuiin a grade kan thiam lo a, a leitu empanelled buyer-ten tih ngaihna an hre lo a. A tawpah sawrkarin, grade siam loin kg-ah Rs. 80-a lak mai a rawt ta tih PC Vanlalruata hian a sawi.
“Marketing Board-in a ngaihtuah a, grading kan thiam si loa, Vaihoin min bargain leh dawn si a, sawrkarin ungrade-in kg-ah Rs. 80-in kum tir atangin la ila, kan ti a. Hun bituk chhungin bul kan tan chho dawn a ni. Tunah hian hmunphiah hring kg-ah Rs.30 atangin Rs. 40-ah a up ta dawrh a. A kum khatnaah kha chuan farmer-te thiam loh ve bawk nen, keini experience kan la nei lo ve deuh bawk nen, kan ti fuh lo. Kuminah chuan a season tirah a lei hun tur kan siam a, kan inkau vek tawh. Collection Centre-ah kg-a Rs. 80-a lei turin kan inpeih vek tawh,” a ti.