Bengaluru player-te’n hlawh tihhniam an remti

Bengaluru player-te’n hlawh tihhniam an remti
Indian Super League (ISL) season thar chu harsatna hrang hrang karah February ni 14 hian an tan ve dawn ta nge nge a, mahse, tun thlengin All India Football Federation (AIFF) lamin ISL huaihawttu tur sumdawng thawhpui an la nei lo a, Indian top flight tan a nih theihna atan federation leh club lamin sum an thawhkhawm ringawt rih a, hei vang hian club lam pawhin an player-te chu an contract ziah aia hniam hlawh pawm thei rih turin an beisei a, Bengaluru FC player-te chuan tlawmngaih chhuahin an hlawh tihhniam an remti ve leh ta!
Bengaluru neitu Parth Jindal chu ISL club official-te zinga an harsatna tawh mek hrethiama tlawmngai tura an player-te hnena ngenna tichhuak hmasate zingah telin, India captain hlui Sunil Chhetri leh star goalkeeper Gurpreet Singh Sandhu-te khelhna South Indian team player-te hian mahni duhthlanna ngeiin hlawh tihhniam an rem tih thu an puang ve leh ta a, thla hmasa pawh khan FC Goa payer-te’n an hlawh cut then an lo remti tawh bawk.
Tarlan tawh thin angin, ISL hian sum tam tak thawh chunga tournament huaihawttu nihna (commercial rights) kawltu an hmu zo ta mai lo a, AIFF commercial partner hlui FSDL nena kum 15 an thawhdunna Master Rights Agreement (MRA) chu nikum December ni 8-a a tawp hnu khan ISL organiser ni duh sumdawng hausa an la chhuak leh thei ta hlek lo a; ISL 2025-26 season pawh a hun takah tan theih a ni ta lo a ni.
Top flight club leh an player-te pawh an beidawng hman rum rum tawh a, club tam zawk chuan an player leh staff-te hlawh pek leh training thlengin an titawp hman hial a; India sawrkar laipui sports minister a inrawlh hnuah AIFF leh ISL khel tur club-te’n sum thawhkhawm rih phawt mai se tiin inremna an siam ta ringawt mai a ni!
An inrem dan chuan league bul tan leh tura sum ngai zat hmun zaa thena hmun sawm ruk chu ISL khel tur club 14-te’n intumsem phawt se, club tinin cheng vaibelchhe khat diat diat tum se; a la bang zawng chu AIFF lamin thawh ve thung se tih a ni.
AIFF chhut danin ISL season thar atana sum mamawh zat hi cheng vaibelchhe 25 a ni a, tunhnaia Lionel Messi leh a thian pahnihte India rawn tlawh vuakveta sum lengvak nena khaikhin chuan ISL huaihawt tura sum ngai zat hi chu ar chil zat pawh a tling lo ang!
Chu chu a eng-a-mah hmaa club lamte sum luanralna tur a nih tak rih avangin first team head coach thar atana India international Renedy Singh ruai thar hlimhlawt Bengaluru FC club neitu chuan tlawmngaih chhuaha hlawh tlem zawk lak remti rih mai tura ngenna an player-te lakah a tichhuak a; first team player-te’n an rem tih hnuah Jindal chuan an footballer-te in-sacrifice-na chu fakin, he sport dawmkan zelna atana chanchin lawmawm a nih thu a sawi.
Tarlan tak angin, India captain Sandesh Jhingan leh a team-mate rualte bakah support staff-te chuan FC Goa nei tute ngenna pawmin hlawh tihhniam an lo remti tawh a, club lamin lawmthu sawina tichhuak ve nghalin, an player-te inpekna chu mahni hmasial lohna tiin an fak.
AIFF Super Cup champion team FC Goa-ah hian India play dang Udanta Singh leh Boris Singh-te pawh an khel mek a ni.