Pa 8-naah Sunderland

February 2, Tha-whtann zan khan English Premier League 2025-26 khelh chhunzawm a ni a, inkhel awmchhunah Sunderland chuan an mikhual chu 3-0 ngawta sawpin pariatnaah an inhlangkai. Sunderland in hma an sawn lai hian Burnley an buai zual a, tlakhniam an hnaih telh telh thung.
Season kal meka chetha tak Sunderland hian Stadium of Light -a an mikhual Burnley lakah bul an tan tha viau a, goal an thawkchhuak thuai. Inkhel tan atanga minute 9-na lekah Burnley defeder Axel Tuanzebe chuan an lamah a ti-goal palh a, mualneitu hmahruaina goal a thunsak. Hma takah goal an thawhchhuah vangin Sunderland an phur a, an khel tha zui viau nghe nghe.
Goal thun belh thuai tumin an khingpuite nawr na viau mah se an hun tha neih an chhawr tangkai mai thei bik lo. Goal thun belh mai thei bik lo mah se chawlhlawk hmain goal an thun belh hman ta tho thung. Black Cats tan hian Mouhamadou Diarra chuan minute 32-naah an goal hnihna thunin an hmahruaina a tizau a. 2-0 a hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, mualneitu Sunderland an chetha chhunzawm. Sunderland tan hian Chemsdine Talbi chuan minute 72-naah Reinildo Mandava siamsak atangin an goal thumna a thun a, an chakna a nem nghet. Talbi goal thun hnuin goal dang a luh belh tawh lova, Sunderland chuan an mikhual Burnley chu awlsam takin an hneh a, phu takin point thum an hmu.
Burnley sawptu Sunderland hian khelh 24 atangin point 36 an hmu a, pariatnaah an inhlangkai. Season tir lama an chetthat angin chetha pur pur tawh lo mah se team nghet pangngai tak an ni la ni zel tho thung. Black Cats hi an mual Stadium of Light-ah tlawm nei lovin khelh 12 chhung an kal tluang ta chiah. Championship atanga EPL a kaisang thar zingah an muala tlawm nei lo zawn rei ber chu Nottingham Forrest an ni a. Kum 1977-78 chhung khan an mualah khelh 12 chhung tlawm an nei lo. Sunderland hian Forrest record an nihrual chiah a, record thar siam turin an mualah game khat tlawm loh chiah an ngai tawh.
An mualah awlsam taka an chak hnuin Sunderland hian kar tawpah fiahna hautak zawk an hmachhawn a ngai dawn a, inrinni zan hian Table-a hmahruai mektu Arsenal chu Emirates Stadium-ah an luhkhung dawn. Gunners nen hian an inkhelh hmasak tumin an lo inhnehtawk tawh a, mikhual an nihna hmunah tlawm pumpelh nawn leh tumin thih tha tak meuh meuh an thawh ang.
Sunderland in hma an sawn laiin Burnley erawh an buai tulh thung a, tlakhniam an hnaih deuh deuh zel. Burnley hian khelh 24 atanga point 15 hmuin 19-naah an awm mek. Inrinni zan hian an chung chiaha awm West Ham United an mikhual dawn a. An mualah an chak a nih chuan him theih beiseina sang zawk neiin an phur thar deuh hluai a beiseiawm. EPL-a inham tang thei turin chetthat tluan an mamawh tawh viau a ni.