Arsenal in final an lut

February 3, Thawhleh zan khan English Carabao Cup semi-final thawh hnihna khelh a ni a. Arsenal chuan London-a an elpui lian Chelsea chu Kai Havertz goal thun hmangin an hneh nawn leh a, final an lut. Arsenal hian Manchester City leh Newcastle United te inkhela chak zawk zawk final-ah an hmachhawn ang.
Carabao Cup semi-final thawhkhatnaah Arsenal hian Chelsea mual Stamford Bridge-ah ngei hnehna an lo chang tawh a, mikhual an nihna hmunah 3-2 in an chak. Chungnung zawk chunga an muala inlan tur an nih vangin chak nawn leh tura rin an ni a, final an luh ngei tlangin an ring deuh thup. An mualah kher chuan Gunners hi hneh har tak an ni.
Hetihlai hian Chelsea hi manager thar Liam Rosenior hnuaiah an khel tha viau a, EPL-ah vawi thum an chak zawn tawh. Manager thar hnuaiah an phur a, an inringtawk viau bawk. Chelsea in Manchester United atanga an hawh mek Alejanro Garnacho chuan Emirates Stadium-ah an chak theih a ring viau thung a. “Manchester United pawh an chak thei a nih chuan keinni pawh kan chak ve thei ngei ang”, a ti. A ni tak a, Manchester United hi Emirates stadium-a chak thar lam ber an ni tlat a ni.
Chelsea hian an muala an tlawm tawhna chhang letin Arsenal hneh let ngei an tum hle. Manager thar Liam Rosenior chuan a player thate a luhtir a, muallaia Arsenal hlauhawmna chhu chat thei turin midfielder pali ngawt remin, defender Marc Cucurella a chhuahtir tam viau bawk. Arsenal dan chah tuma thapui thawh an ni bawk a dan pawh an dang rei viau. Blues hian Gunners hi an dang a ni satliah lova ball chang tam zawk an ni a, shot ngah zawk, corner hlawhchhuak tam zawk, ball pass hnem zawk leh pass dik tam zawk an ni vek a. A pawimawh ber goal an thun loh an tuar.
Arsenal manager Mikel Arteta pawhin champion an mamawhzia a hrechiang a, an khingpuite an nep dawn lo tih a chiang viau bawk. A player ‘tha thenkhat awltir bawk mah se team lian laka a chhawr thin player tam zawk a chhawr. Final lut turin an chak zo lo a nih pawhin tlawm pumpelh an ngai a. Gunners hian final luh ngei tumin an mualah tan an khawh a, inkhel hmuhnawm tak an lantir.
Arsenal hian an mualahbul an tan tha viau a, an mikhualte an nawr na nghal hle. Inkhel tan tirh lamah corner atangin hlauhawm an siam nghal. Handball vangin penalty hlawhchhuak ngei turah inngai bawk mah se an hlawhtling zo lo. Penalty an beisei thlawn hnu lawkah defender Piero Hincapie chuan tha zeta petin goal a thun teuh hle a. Chelsea si nghak Robert Sanchez chuan pui zetin a lo dang hman hlauh a, an team a chhanhim. Gunners tan hian Gabriel Martinelli chuan a hun tha neih a chhwar tangkai thei lo bawk.
Arsenal in an hun tha neih an hlah mawlh mawlh hnuin Chelsea in hun tha an nei zawn ve leh a. Singhak Kepa chuan hna tha thawkin an team a chhanhim ve bawk. Team hnih ten hnehna chan ngei tumin tan an khawh a, goal thun tumin an innawr tawn nasa hle. Hun tawp dawn hnaih lamah Chelsea in goal thun ngei tumin thapui an thawh a, goal thun an tum luatah an chesual. Arsenal in an khingpuite an nawr let thut a, goal thun theihna hun remchang tha zet mai an hmu. Decland Rice hnen atanga a ball hmuh tha tak chu Kai Havertz chuan fing takin a khalh tlang a, si nghak Sanchez a bum hnuin goal rualah awlsam takin a pet goal a, minute 90+7-ah hma an hruaina goal a thun. Chelsea in an forward hlui Havertz goal thun hi an sut thei tawh lova, Arsenal lakah hreh tak chungin an tlawm nawn ta a ni.
Tarlan tawh semi-final thawhkhatnaah 3-2 in hnehna an lo chang tawh a. Havertz goal thun hmanga hnehna chang lehin sei belh khawmah 4-2 in hnehna an chang a, Carabao Cup final an lut. Final an luh tak vangin next season thlir thin Gunners in rophy an hnaih leh zual sauh. Hun rei tak hnua trophy chawi leh turin Arsenal hian Wembley-a chak chiah an mamawh tawh. Semi-final thawhhnihna hi nilai zan khan khelh a ni a. Arsenal hmaa ding tur zawk kan tarlang hman lo.