Harry Styles ‘Aperture’ Billboard Hot 100 No.1-ah a debut

Last updated Feb 5, 2026 3 0

Harry Styles ‘Aperture’ Billboard Hot 100 No.1-ah a debut
Harry Styles hla thar ‘Aperture” chu Billboard Hot 100 (US singles) chart No.1-ah a debut a, solo artist anga he chart-a No.1 kai thei hla pathum a neihna a ni ta a, a hla dang ‘As It Was’ chu April 2022 khan No.1 kaiin, ‘Watermelon Sugar’ chu August 2020 khan No.1 a kai tawh bawk.
Billboard Hot 100 hi kar khat chhunga US-a hla lar dan tehna a ni a, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Harry Styles ‘Aperture’ hian kar khat chhungin US-ah stream maktaduai 18.2, radio airplay ngaithlatu maktaduai 27.1 leh sales 4,000 a nei a, hei hi chart-ah a No.1 pui ta a ni.
‘Aperture’ hi Harry hla he chart-a No.1 kai thei pathumna a nih rualin, One Direction angin No.1 kai thei hla paruk a lo nei tawh bawk. ‘Aperture’ hi kumina he chart No.1 a debut thei hla pahnihna a ni a, chart No.1-a debut tih chuan, chart ranking-a a lan theihna hmasa bera No.1 ni nghal tihna a ni. Kumina hla dang he chart No.1-a debut chu Bruno Mars “I Just Might” a ni a, hei hi ‘Aperture’ hian No.1-ah a thlak chiah bawk.
Ella Langley “Choosin’ Texas” chu No.3 atangin No.2-ah a insawn a, he hi Hot Country Songs chart-ah chuan kar 10 a No.1 tawh. Olivia Dean “Man I Need” chu No.2 atangin No.3-ah a tawlh ve thung .
Chart No.1 hlui HUNTRIX “Golden” chu No.4-ah bawk a la awm a, he hla hian 68th annual Grammy ceremony-ah khan best song written for visual media a dawng a, Korean pop nena inkungkaih hla zinga Grammy dawng hmasa ber a ni.
Chart No.1 hlui, he chart-a kar 10 No.1 ni thei, Taylor Swift ‘The Fate of Ophelia” chu No.3 atangin No.5-a a tawlh a, he hla hi Swift hla zinga No.1 ni rei thei ber a la ni.
Bruno Mars “I Just Might” chu kar hnih a No.1 hnuah No.6-ah a tawlh a, Chart No.1 hlui, Alex Warren “Ordinary” chu No.5 atangin No.7-ah a tawlh a, Sombr ‘Back to Friends’ chu No.7 atangin No.8-ah tawlhin, Kehlani “Folded” chu No.8 atangin No.9-ah a tawlh a, Taylor Swift “Opalite” chu No.10-ah bawk a la awm.