Sorkar thar duh lotute’n thawm nei

On Feb 7, 2026 6 0

Sorkar thar duh lotute’n thawm nei
President’s Rule hnuaia hun engemaw chen an awm hnuah Manipur-ah sorkar thar a ding a, chief minister pawh lakluh a ni tawh. Zo hnahthlakte’n sorkar thar din hi an duh lo a, Ningani zan khan thalai thenkhatin thawm an nei.
Manipur-a Zo hnahthlakte hian an buaina chin fel a nih hmaa sorkar din an duh lo a, chutih laiin India sorkarin sorkar a din tawh thung. Chief minister tur lakluh a nih hnuah February ni 4 khan deputy chief minister atan Zo hnahthlak Nemcha Kipgen lakluh a ni.
February ni 5 zan tirah Churachandpur-ah sorkar thar duh lotu thalai thenkhat an chhuak khawm a, venhim hna thawktute nen an inum.
Hemi zana thil thleng hi pawl thiltih a ni lo a, thalai engemaw zat an chhuak khawm deuh thut mai tih thu dawn a ni. Tuibong velah an che a, lirthei ke te halin an lungawi lohna an aupui a ni.
Churachandpur atanga thu dawn danin, venhimna hi a khauh sa a, President’s Rule hnuaia awm, sipai duty-na an nih bakah sorkar thar din hnuah an khauh zui a, MLA-te inte phei chu ngawrh taka ven a ni. Chuvangin venhim hnathawkte hian thalai chhuak khawmte hian sorkar hmun emaw MLA-te in emaw an pan ang tih te an hlau a, hnawh darh an tum nghal.
Zan dar 6 vel atanga dar 9.30 vel thlengin thawm a awm a, thil duhawm lo a thleng zui lo tih thu dawn a ni.
Zo-Kuki Council-in ZIrtawpni khan Zo hnahthlakte awmna hmunah total bandh an huaihawt a, hemi ni hian khaw thenkhatah chuan mipuiin kawng an zawh bawk.