Zirlaite nena PM hoa hun hman Aizawl atangin live-in lo chhim

Prime minister Narendra Modi hoa Zirtawpnia Delhi-a Programme Pariksha Pe Charcha 2026 hman chu School Education minister Dr Vanlalthlana hoin Aizawlah live-a thlirin lo hmanpui a ni.
Pariksha Pe Charcha-ah hian Prime minister chuan Delhi-ah state tin atanga zirlai thlan chhuahte kawmin exam hmachhawn dan tur leh zirlaite zirna atana tangkai tur a sawipui a. Mizoram atangin PM Shri KV School Aizawl-a class XII zirlai Lalthlamuanpuii a tel. He programme hi India ram hmun hrang hranga zirlai leh zirtirtuten live-in an chhim a ni.
Zirlai kalkhawmte hian Prime minister chu Pariksha Pe Charcha an hlawkpuizia an hrilh a. Mathematics hlau thin khan Pariksha Pe Charcha atang hian an hlau tawh lo a, thian ang maia an ngaih tak thu an hrilh. Prime minister lehkhabu ziah – Exam Worriors an chhiar atangin exam dawna rilru hahna nei thinte pawhin an tangkaipui tih an sawi a. Fail hlau loa hmalam pana lehkha an zir theih tak thu an hrilh a ni.
Prime minister chuan zirlaite chu mark ringawt ngaihtuah loin, nun kawng hriatna leh thiamna nei turin a chah a. Chumi atan chuan rilru lama inthununna, hriselna vawnthat leh insawizawi ngaipawimawh turin a chah. Exam chu thiam enna a ni a, nun pum luahtu a ni lo tih sawiin, zirna kalkawng anga hmang turin a chah a ni.
Aizawla hun hmanah School Education minister chuan, exam laiin ‘pressure’ a san thin avang leh chu chuan zirlai tam takah harsatna a siam thin avangin Psychologist Association nen tangdunin helpline siam an tum a, tihhlawhtlin theih a nih chuan zirlai tam tak tan a tangkai a beisei tih a sawi.
“Exam hmachhawn hi thil peihawm loh tak ni mah se, puitlinna kawng zawhna atan paltlang a ngai a, harsatna paltlang hian chakna min pe a, exam hian chakna min pe thin,” Dr Vanlalthlana hian a ti a. Kan thluak kan hman tam poh leh a chak a, thluak chu sawizawi a ngai thin a, exam hian kan thluak a sawizawi a, a tichak thin a, thluak tihchak turin exam a pawimawh tih a sawi a ni.